AG FELCO 9-12-2017 – Rapòrt moral – Rapòrt d’activitats

Publié le 14 décembre 2017 par Marie-Jeanne Verny

RAPÒRT MORAL FELCO 2017

Coma de costuma, l’annada 2017 foguèt mai animada que çò previst.

A l’Amassada Generala de l’an passat, esperàvem pas pus grand causa de la part d’un ministèri sul despart que nos aviá fait fòrça promesas e que n’aviá tengut sonque qualquas unas.

Lo 26 de genièr la convencion-quadre pel desvolopament e l’estructuracion de l’ensenhament de l’occitan èra signada entre lo ministèri de l’Educacion nacionala, las regions Nòva Aquitània e Occitania e l’Ofici Public de la Lenga Occitana. Bona novèla… en esperant las declinasons academicas que, per endreits, meton pron temps a èsser redigidas.

Al mes de març, l’agregacion de lengas de França que nos aviá anonciada lo ministèri al moment del collòqui de la FLAREP d’octobre de 2016 èra oficialament creada.

La suspresa venguèt a la tota fin de març amb una proposicion de circulara (promesa dempuèi 2012) de la part del ministèri. Circulara decebenta e que constituissiá un recuol cap a çò existent. Un trabalh de negociacions menat amb la FLAREP e de reescritura portat en granda part per la FELCO permetèt de limitar los degalhs. La circulara 2017-72 del 12 d’abrial 2017 a permés de reafirmar una volontat de desvolopament dels dispositius bilingües, d’insistir un còp mai sus l’importància dels CALR, de determinar d’oraris minimum pels ensenhaments de lenga regionala e, çò important per l’espaci d’òc, subordona pas l’existéncia de nòstre ensenhament a l’existéncia de convencions entre las collectivitats localas e los rectorats. Es donc pas un tèxt revolucionari, mas nos permet de nos apuejar sus un quadre un pauc mai solid que lo precedent, que se trapava despassat per la mesa en plaça de la refòrma del collègi.

 

Pr’aquò, après aquesta fin de mandatura dinamica – tot simplament perque lo demai de la mandatura o foguèt pas – las causas s’endevenguèron d’un biais plan diferent.

Après una campanha presidenciala e legislativa ont los candidats foguèron pauc nombroses a prene pausicion sus la question de las lengas regionalas e de lor ensenhament malgrat l’accion 2017oc que la FELCO i participèt – dins lo limit de sos mejans umans – e malgrat de relanças regularas, foguèt impossible fins a la setmana passada d’obténer un rendètz-vos alprèp del ministèri novèl.

Meteissa decepcion cap als deputats : las responsas a nòstres mandadisses regulars son mai raras qu’aperabans e las questions escritas o oralas pausadas al govèrn a prepaus de nòstres ensenhaments o son logicament tanben. Veire lo trabalh de compilacion fach per Bruno Duranton : http://www.felco-creo.org/category/l-occitan-e-la-vida-publica/deputats-e-senators/.

Pasmens, la FLAREP capitèt d’obténer una audiéncia al Ministèri al mes de julh, que lo Sandre Arnaud i representèt la FELCO. Entreten decebent del vejaire dels participants que se sentiguèron pas entenduts pels conselhièrs del ministèri (http://www.felco-creo.org/la-flarep-recue-au-ministere-le-10-juillet/ ).

Enfin, serem recebuts al minsitèri per Matthieu Lahaye, conselhièr encargat de las LR, lo 20 de decembre. Serà l’escasença d’evocar la question de la demesida de l’ofèrta de pòstes al CAPES e de la dubertura de sonque un pòste per l’agregacion ; une demesida que met clarament nòstre ensenhament en dangièr e constituís un fren al desvolopament de nòstre ensenhament e una empacha, dins las academias ont n’i a, a l’aplicacion de las convencions. Aquela audiéncia, coma de costuma, serà preparada – e acompanhada – per un dorsièr precís que son montatge es a se faire e que demandarà l’ajuda de totas las associacions academicas.

Costat FLAREP, justament, lo collòqui annadièr se debanèt aquesta annada en Guaiana. Nicolau Rei-Bèthvéder i representèt la FELCO e ne faguèt un rendu-compte detalhat (http://www.felco-creo.org/compte-rendut-de-lag-de-la-flarep-a-matoury-aglomeracion-de-caiena-guaiana/).  l’escasença del renovelament del CA, Sandre Arnaud, que seguís dempuèi d’annadas los acamps de la FLAREP, foguèt elegit vice-president. L’an que ven, lo collòqui se debanarà en Alsàcia e son tèmi serà la formacion dels ensenhaires en lengas regionalas

La FELCO sèrva tanben sos ligams amb l’Associations des Professeurs de Langues Vivantes (APLV) mercé als collègas del CREO de la Talvera. Patrici Roques nos representa al CA de l’APLV.

Sul plan de la vida intèrna de la FELCO, podèm pas que nos felicitar de la reactivitat del mond quand son consultats suls divèrses dorsièrs. Es aquela reactivitat e lo fait que cadun a son nivèl, amb sas coneissenças sus tal o tal grad d’ensenhament o tal o tal subjècte particular, que nos permetèt en particular de fargar un dorsièr solide al moment de la redaccion de la nòva circulara.

Coma o foguèt decidit l’an passat, prepausarem dins l’AG extraordinària que seguís de cambiaments d’estatuts per tal de rendre mai clara la composicion del CA e per inscriure la possibilitat de lo consultar per internet o visioconferéncia.

Aquò fait, nos caldrà virar cap a l’avenidor :

– Avenidor immediat : lo rescontre al ministèri del 20 de decembre que nos i cal anar amb un dorsièr solide per ensajar d’obténer de pòstes en mai e assabentar lo conselhièr sul dorsièr de l’ensenhament de l’occitan en general e de la situacion sul terrenh.

– Avenidor pròche :

– la refòrma anonciada del bachelierat e, en seguida, una nòva refòrma del licèu que nos caldrà èsser particularament atentius a çò que resèrva a nòstres ensenhament. D’aquò tanben ne parlarem al ministèri.

– la situacion dins las universitats amb la disparicion efectiva o programada de las formacions. Sus aquò, avèm un apèl a l’ajuda dels collègas de Niça que nos i caldrà respondre.

– Nos cal pas tanpauc doblidar las academias « sinistradas », las del nòrd de nòstre espaci, que patisson e que, pauc a cha pauc, l’ensenhament de la lenga nòstra i desapareis. Aquí tanben nos caldrà faire comprendre al ministèri l’urgéncia de la situacion.

 

Brèu, sens suspresa, avèm encara plan d’òbra. Mas quitament se la situacion es pas flama, avèm per nosautres d’èsser una còla que s’investís un pauc mai cada annada e qu’agís collectivament. Se totes i cresèm e subretot se totes o fasèm, quitament un pauqueton o sonque a un moment qu’òm sentís qu’òm pòt èsser util sus un subjècte particular, una situacion donada, capitarem a faire bolegar las causas.

FELCO Rapòrt d’activitats 2017

Notar, en mai d’aquò

  • una cronica mesadièra dins Jornalet, interrompuda dempuèi l’auton (en causa, probable, de la situacion catalana)
  • Mai d’una intervencion sus de situacions particularas de collègas
  • Une responsa personalizada facha a cada deputat que nos escriu.
  • La mesa a jorn regulara del siti
  • Lo mandadís (irregular, saique), de la letra d’informacions
  • Los contacts regulars amb OCBI
  • Los contactes regulars amb las associacions academicas.
Ce contenu a été publié dans Vida intèrna. Vous pouvez le mettre en favoris avec ce permalien.