Redigit per Virginia LAGO e Maria Joana VERNY, amb l’integracion de las contribucions academicas.

l’AG s’es tenguda en visio-conferéncia

Desencusats : E. Barthe (CREO Tolosa) B. Bringué, R. Chouleur e J. Soliva (CREO LENGADÒC), T. Hirondèla (CREO Aquitània), M. Chateaureynaud (CREO Aquitània).

Presents

1. Albert (Montpelhièr)
2. Barcelo (Granòble)
3. Bolano (Montpelhièr)
4. Bonet (Auvernhe)
5. Cayrol (Tolosa)
6. Chabaud (Montpelhièr)
7. Chapduelh (Tolosa)
8. Courouau (Tolosa)
9. Courcelle (Tolosa)
10. Duranton (Tolosa)
11. Galvier (Montpelhièr)
12. Isopet (Tolosa)
13. Konopnicki (Montpelhièr)
14. Lago (Tolosa)
15. Lame (Montpelhièr)
16. Laupies (Montpelhièr)
17. Laurent (Ais)
18. Grangé (Aquitània)
19. Marçais (Niça)
20. Martel (Montpelhièr)
21. Menassol (Tolosa)
22. Mercadier (Tolosa)
23. Pasquetti (Niça)
24. Poitavin (Ais)
25. Roques (Talvèra)
26. Serva (Montpelhièr)
27. Tressoldi (Montpelhièr)
28. Verny (Montpelhièr)

De notar la preséncia de

• Silvan BLACHON, cargat de mission ensenhament escolar a l’OPLO
• Benjamin ASSIE, Conselhièr Regional Region « Occitanie », vice-president de l’OPLO

10 h 05 : Obertura. Le president Olivier Pasquetti merceja les particiants. Saluda la preséncia de l’OPLO. Merceja l’OPLO per la collaboracion amb la nòstra associacion.

Punt sus las situacions academicas

Ais

Contèxt general

L’Academia beneficia pas de l’enquadrament per l’OPLO, existís pas de convencion ambe la Region. Se podèm pausar la question del ròtle d’una tala convencion se veniá a espelir : prendriá-ti part dins la reflexion nacionala per l’aparament de l’occitan-lenga d’òc dins lo respècte dei tèxtes iniciaus fachs per l’ensenhament public ? Quau serián leis elegits e leis associacions responsables d’aquel engatjament ? Coma seriá respectat l’aparament de l’occitan-lenga d’òc dins lo respècte dei tèxtes iniciaus fachs per l’ensenhament public ?

De son costat, L’AELOC contunha son trabalh d’edicion, publica d’obratges e co-organizarà un collòqui dau FORUM d’OC^[1] lo 5 de febrier de 2022. Tendrà tambèn son colòqui bisannuau en Novèmbre.

De notar la fòrta disparitat academica ont lei departaments aupencs (04 e 05) son completament sinistrats.

CALR

Un CALR en visio se tenguèt lo 18 de Març de 2021. Totei lei partenaris (sens excepcion) demandèron de mejans especifics per la LR. L’idèa fuguèt refusada a la fin de l’acamp per leis administratius au nom de l’egalitat deis opcions ai licèus. Aprengueriam, mercés a la volontat dau rectorat e dau rector, que lo collèga d’as– Ais e Vitròlas retrobava seis oras perdudas en causa d’una DGH tròp flaca. Per contunhar dins aquela draia, l’AELOC demandèt mai de mejans per totei lei collègas. L’idèa fuguèt pas entenduda.

Segondari

Patissèm de segur, coma leis autres, dau contèxt nacionau (Perdas d’oras, manca d’interèst per la LVC maugrat l’aumentacion dau coeficient, perdas d’escolans en 2nda, remontadas fragilas en 1^èra e t^ala per lei lvb). L’ensenhament d’especialitat existís pas enluòc.

Remarcam pasmens l’engatjament e la vòia de l’encargada de mission e dau Rector que defend lo provençau : letras ai caps d’establiments, librilhon per la promocion de la lenga estampat per l’acadèmia. De projèctes pedagogics (musica, museon arlaten) fuguèron montats e mediatizats. Lo Rector fa tanben de reunions publicas e mediatizadas per nos dire son sostenh. Un esfòrç es fach per faire obrar totei lei collègas dins la lenga : complements de servici dins leis escòlas elementàrias, creacion d’un manuau pel licèu, animacion informatica per la lenga au rectorat que valoriza lei practicas pedagogicas. Lei collègas en sota-servici restan pas sensa trabalh e es justificat per una letra de mission dau Rectorat per cada professor onte son servici es detalhat (per pas que fague autra causa que d’occitan-lenga d’òc dins seis establiments) La lenga regionala es la prioritat defenduda ribon ribanha per lei servicis dau rectorat (e mai lei collègas siguesson sus tres ò quatre establiments).

Primari

Dins l’escòla primaria, essencialament dins lo 13, lei sites publics son lei centres d’ensenhament contunh- (autra especialitat de l’Acadèmia d’as – Ais, essencialament dins lo 13) que son meses en difficultat de mai en mai.

Formacion en INSPE

Aquest an l’occitan-lenga d’òc es enfin intrat dins la maqueta de l’INSPÉ e dins d’oraris normaus. Un grop fonciona a Marselha, un autre as Ais, pèr Avinhon un grop a poscut èstre constituit pèr lo segond semèstre, serà tratat en distanciau pèr l’intervenenta de Marselha. Sèmbla possible de posquer assegurar totei leis opcions l’an que vèn, la situacion de Dinha estènt pas encara reglada. L’AELOC paga leis intervencions que son pas dins lo servici deis intervenènts.

Bordèu

Purmèr grad

En Aquitània que viram a 2600 eslhèves qui segueishen un dispositiu bilingua e 4000 eslhèves qui hèn occitan. Augan 3 sitis navèths d’ensenhament bilingua : Le Bugue (Dordonha), Lo Mont (Lanas), Saut (Pirenèus-Atlantics).

La formacion « Ensenhar » e l’ensenhament en master MEEF que permet d’ahortir lo nombre de professors. Mes dus departaments que demoran sinistrats per la hrèita de professors (40-47).

Dusau grad

• 2500 eslhèves que segueishen un ensenhament d’occitan. 2100 en opcion au collègi, 250 en DNL en collègi, 130 en licèu. Ubèrtura d’ua DNL a Lengon (Gironda).
• Que i a besonhs de professors en DNL, e professors qui son passejats d’un establiment a un aute.
• Problèmas d’ajustament entre òras e personas.
• Qu’avem tostemps un problèma de continuitat pedagogica entre purmèr e dusau grad e de stabilitat de las cordèras deu dusau grad.

De mei que deploram la non presa en compte de l’occitan dens lo navèth percors preparatòri au professorat de las escòlas (PPPE) qui ei perpausat sus dus lòcs, licèu e fac. En efèit las òras que son presentas pertot mes que manca un professor en licèu. Quan vedem la hrèita de professors qu’ei de mau comprene.

Clarmont

• Manten dels mejans : dos pòstes : un dins lo segondari e un dins lo primari
• Un pòste dins lo segondari : un professor afectat sus 1 licèu (2 liceans) e 5 collègis (170 collegians) sus la mitat oest del departament, doas seccions bilangas dins aquestes collègis.
• Dins lo primari, un pòste de mèstre caminaire, nomenat aqueste an « animator occitan ». Iniciacion al nivèl departamental per las classas que ne fan la demanda. Aquesta an, 127 classas dins 50 escòlas an demandat d’intervencions, çò que representa 6 a 7 sesilhas sus un periòde (temps entre las pichòtas vacanças).
• Lo CALR s’es pas recampat dempuèi 2019, entretemps son passats la crisi sanitària e l’arribada d’un novèl secretari general al rectorat…

Granòble

En 2021, la situacion de l’ensenhament public demòra quasi desertica, limitada al departament de Droma (res en Ardecha ni dins lo sud d’Isèra) : dins lo primièr gra, sonque una professora de las escòlas itineranta qu’inícia a la lenga nòstra totes los escolans de la circonscripcion de Nions ; dins lo segond gra, un total de doas oras d’ensenhament dins lo collègi REP+ Gustave Jaume de Pèiralata (una ora setmanièra 6a-5a, una ora setmanièra 4a-3a). Pas cap de pòst de certificat d’occitan-lenga d’òc. De notar la creacion d’un cors d’iniciacion a l’occitan a l’Universitat de Granòble.

Un ponch positiu : lo 21 d’octòbre, se tenguèt enfin, après d’annadas de silenci, lo CALR, ont la rectritz se mostrèt puslèu favorabla e dobèrta a las lengas dichas regionalas, en prometent que i auriá de grops de trabalh, e una reflexion sus la possibilitat de tornar crear un pòst de certificat d’occitan, especialament a l’entorn de Nions. Lo DASEN de Droma se mostrèt mens entosiasta, e cal notar que dins lo sol collègi ont l’occitan existís vòl desvolopar una seccion d’anglès europèu. L’IEO Auvèrnhe-Ròse-Alps e lo CRÈO Daufinat-Vivarés an escrich en debuta d’an 2022, amb l’ajuda del burèu de la FÈLCO, una letra a la rectritz per li demandar de complir sos engatjaments

Montpelhièr

Una situacion plan melhora dempuèi qualques meses mercé a la signatura de la Convencion amb una implicacion evidenta de la Region e de l’OPLO. Los cambiaments amb lo Rectorat son espectaculars : grops de trabalh departamentals, comitat de pilotatge academic se succedisson… Un molon de reunions, mas dins un ambient positiu e una volontat d’avançar evidenta, mai que mai dins lo primièr gra amb de duberturas de seccions bilinguas e una atencion portada a la continuitat.

La situacion es flaca flaca dins lo segond gra, mai qua mai en licèu, per en causa de la reforma qu’a encara mai « plombada » una situacion que malautejava dempuèi d’annadas. Per aquò presam la campanha « licèus » de l’OPLO, sens n’esperar de miracles, que lo foncionament tot del licèu es poirit per la reforma : per un professor d’occitan, installar sa disciplina dins un ambient de concurréncia.

Obertura d’un cursus bilingue dins Gard. Obertura DNL a Narbona. Redubertura au licèu de Mende. Montpelhier : obertura d’un EDS.

De notar la bona santat del CREO : una pujada de 20 % dels aderents abans Nadal : avèm passats los 100 e de collègas joves s’implican, i comprés a l’INSPE ont un jove collèga en formacion a creat una « antena » CREO.

Niça

Primari

3 sites bilingues, 2 a Niça, 1 dins Var (Cuers). A Niça, un centenat d’escolans dins le 1^er site. Segond site obert fa tres ans. Volontat de far creéisser l’ensenhament bilingue. Pas de problèma de ressorças umanas disponiblas, mas es malaisit de motivar los collègas competents per anar trabalhar en bilingue.

Rèsta deu primari : i a un CPD que s’encarga tanben de las autras lengas. Dificultat de saber se las demandas d’oras abotisson e ont se fai d’oras d’occitan

Segondari

Estabilizacion en collègi. Estagnacion en licèu. Mas sèm tombats talament bas que podèm pas far pièger. Arribada d’un professor certificat de mai. 14 certificats e 5 abilitats. Daas pèrtas d’ensenhaires, ne sèm a un vintenat.

Tolosa

Primièr gra

• Seccions bilingues : 4173 escolans en primari. L’auumentacion es flaconeta (+ 36 escolans). Per informacion e comparason a la dintrada 2018 i aguèt una aumentacion de 99 escolans. Dins lo periòde 2014-2018, los efectius creissián de 216 escolans per an… Es passat a 33 en mejana sus las 3 annadas seguentas.
• La mesa en aplicacion de la convencion Estat-Region (enfin !) : sembla aver permés l’obertura de dos sites bilingues après doas annadas d’immobilisme.
• Dubertura de doas seccions bilingues : Vic-Fesensac e Tolosa.

Segondari

La situacion contunha de se degradar. Nos regaudissem de l’ajustament de la refòrma del licèu mas aquò escafarà pas las darrièras annadas. Quasi tot es de tornar bastir en licèu. Demòra pas qu’un solet licèu dins tota l’aglomeracion tolosana, un solet dins Gèrs, dos dins Òlt… Los efectius son passats de 10958 en 2018 a 5981 ongan, çò que significa una biasa de 4977 escolans (baissa de 45,42%). Perdem 117 escolans aquesta rentrada. Demesidas gròssas de las oras dempuèi 2018 a maugrat deus besonhs reaus :

• Licèu entre 2018 e la rentrada 2021 : perda de 89,8 oras. Entre 2020 e 2021 : perda de 19 oras.
• Collègi entre 2018 e 2021 : perda de 239,2 oras. Aquesta dintrada perdèm 57,45 oras

Au licèu, constatam las consequéncias de la refòrma e las maissantas volontats dins l’aplicacion de çò possible

• negacion de la possibilitat de cumular l’opcion occitan amb « maths expertes » o « maths complementàrias» en terminala.
• refús d’afichar la possibilitat de s’inscriure en occitan LVB e pressions per empachar aquestas inscripcions
• refús de botar 3 oras setmanièras en LVC occitan.
• La continuitat pedagogica malaisida pels bilingues : La DNL del licèu de Lavaur es totjorn incomplèta, es totun dubèrta dempuèi 4 annadas.
• Gestion escura dels miejans oraris : Las dotacions oràrias per las opcions benefician d’una règla clarament enonciada : 2 oras sur lo marge d’autonomia de l’establiment, la rèsta balhada pels mejans rectorals. Mas la règla es pas respectada per totes los establiments que veson lor marge demesir tanben. En mai d’aquò, la dotacion rectorala a pas totjorn de sens per rapòrt a la realitat del terrenh : I a quasi 90 professors d’occitan dins l’acadèmia mas sonque 54 ETP. I a donc de collègas en jos servici en occitan (que son de còps emplegats sus d’autras missions que non pas l’occitan) e aquò malgrat lo besonh en oras, mai que mai en opcion. Son en jos-servici mas pòdon pas balhar mai d’oras d’opcion o prepausar una iniciacion generalizada…
• Problèmas amb las derogacions : A Tolosa, i a pas que le licèu Sent-Sernin que prepausa l’occitan perl’aglomeracion tolosana tota. Coma es fòrça demandat, las derogacions son pas acceptadas per la LVC mas sonque per la LVB. Atau, i a pas cap de possibilitat per un licean tolosan de seguir l’ensenhament en LVC. Au licèu Bellevue d’Albi, totas las derogacions per l’occitan foguèron refusadas a la dintrada 2020. Aquò representava 10 escolans.

Conselhièrs pedagogics departamentals (CPD).

La convencion es pas respectada : en Arièja, totjorn pas de CPD qualificat en occitan. Gèrs a pas de CPD. Tarn n’a pas mai pel moment. Auta Garona a pas qu’un solet CPD luòga de dos. Tarn e Garona perd un CPD. Òlt n’a qu’es pas titulari du CAFIPEMF mentre que l’ancian titular deu pòste es placardizat dins las descargas de direccion.

Grops de tribalh

Los grops de tribalh departamentaus se son tenguts, mes pel moment las asseguranças de desenvelopament de l’occitan son magras. Esperam que las sessions seguentas permetràn progressions significativas per la rentrada 2022.

Bilanç de la convencion Estat Region

La convencion per lo desvelopament e l’estructuracion de l’ensenhament de l’occitan, signada pel periòde 2017-2022 arriba a la siá fin. Suls dos objectius chifrats, lo nombre d’escolans bilingues en primari e le nombre de CPD, es un escac.

La Talvèra :

Son aqui ende testimoniar de la preséncia de l’occitan dins la region parisenca. I a un cursus a la Sorbonne. Quitament s’i a pas d’ensenhament, la preséncia d’aquetg CREO es important. A còps, entenem mès l’occitan a Paris que non pas au pais. I a d’autras Talvèra a Peitiers e Lion.

Rapòrt moral

Los principis del mandat : trabalh collectiu e atencion a las acadèmias sinistradas

Lo travalh collectieu, la consideracion de cadun e la lucha per li zònas sinistradi foguèron li tres premieri preocupacions qu’ai exprimidi quora venguèri President de la FELCO au mes de genoièr passat. En pensant au travalh provedit per lu mieu predecessors, Felip Martel pi Yan Lespoux que m’ajudèran a acapir lo fonccionament de la FELCO, la reactivitat mas la luciditat tanben que nen cau aver sus l’actualitat e sus cada dorsièr da tractar, considerant tanben l’eficacitat dau burèu, lu collègas que son aquí despì tant d’annadas e que gauch au sieu investiment grandàs credibilizan la FELCO e fan qu’aquela associacion es fòrça considerada per la sieu onestat onestetat intellectuala, es en aquesta dralha qu’ai vorgut entamenar lo mandat que m’avètz confidat e per loqual n’en siau siáu tot onorat.

Las comissions de trabalh : una practica novèla

Enfin, au nivèu intèrne, si podem regaudir de la creacion dei comissions de travalh (1er gra, 2nd gra collègi, 2nd gra licèu, privat confessional e INSPE). Podem rengraciar lu collègas qu’an acceptat de n’en pilhar la responsabilitat e, s’aqueli commissions n’en son encara qu’a l’estadi de principi, cau saludar que caduna d’ela s’es ja tenguda au mens un còu. Aqueli commissions permeton ensin de remembrar a l’ensems dei collègas de la materna a l’universitat que, se quauqui fes l’actualitat monopoliza la FELCO mai sus un nivèu que sus un autre, l’associacion es aquí per considerar cada ensenhaire de cada acadèmia sus cada nivèu. Aquela eterogeneïtat de situacions fa la nòstra especifictat mas pòrge tanben una riquessa unica que n’ai, en tant que president, l’obligacion de faire espelir n’en faguènt la nòstra fòrça

2021 : una annada unica

Après lo 2020 marcat per un gròs travalh intèrne a l’associacion e caracterizat per la redaccion d’estatuts nòus, lo 2021 pòu èstre definit coma una annada unica.

Unica emb li nòstri condicions de travalh sempre mai dificili per causa de la crisa sanitària, unica tanben per lo nivèu de patiment de totplen de collègas mas unica emb l’esper que n’an porjut la lei Molac e la circulària ministeriala.

La lucha e lo travalh collectieu pagan sempre e l’avem vist durant l’estieu emb l’arrestat ministerial qu’evalua mai lu coeficients per l’opcion a l’examen dau Bac. Sus aquelu doï ponches d’esperança, vòli saludar la posicion que la FELCO a totjorn auguda per afortir la defensa e lu interès de l’ensenhament pùblico e privat confessional de l’occitan portats en lo mandat que la FELCO a donat a Maria-Joana Verny per nen rapresentar dintre lo Collectieu « Pour Que Vivent Nos Langues », portats tanben en la contribucion rica de Felip Martel a la redaccion dei tèxtos d’aqueu collectieu sensa oblidar la tecnicitat e l’expertisa de Gilbert Mercadier per remembrar a PQVNL qu’es ben l’ensenhament pùblico que patisse despí d’annadas.

Sus la nòstra accion dins lo collectiu Pour que vivent nos langues

Exprimi ancuèi un sentiment partajat…

• D’un costat, lo gaug de veire que lo debat parlementari a permés a la FELCO de sollicitar mantun còu lu deputats e senators per lu sensibilizar un còu de mai sus la question dau licèu, sus l’abséncia de mejans especìficos ministerials, sus li acadèmias sinistradi e doncas sus lo problèma de l’inegalitat republicana e enfin sus la question de la formacion e dei concorses. De la lei Molac fins a la publicacion de la circulara ministeriala, exprimi doncas la satisfaccion que la FELCO a profitat de cada oportunitat que si presentava per revendicar lu problèmas especìficos que tòcan l’ensenhament pùblico e privat confessional de l’occitan. Sabi li oras de consultacion dintre lo CA per s’accordar sus la version finala d’un comunicat, sus lu tèrmes d’emplegar dintre una letra mandada au ministre, sus la filosofia d’una accion menada au nom de la FELCO. Sus aquò, avètz fach pròva d’una contribucion essenciala e d’una reactivitat sensa falhiment; vòli rengraciar lo CA per la sieu leialtat e la sieu disponibilitat en cada espròva. Foguèt luenh d’èstre simple de faire valer a cada escasença ligada a la lei Molac e la redaccion de la circularia la problemàtica de l’ensenhament pùblico e privat confessional mas lo nòstre fonccionament de mandat, lo vòstre avis donat doncas, e li vòstri contribucions an permes de donar mai de pes a la nòstra paraula. Precisi tanben que dintre aquela partida dont “jugar dei coïdes” es un efemism, la collaboracion estrecha e istòrica emb OCBI e l’ajuda e lo relai de l’OPLO foguèron mai que preciós.
• Dun autre costat, exprimi una decepcion e m’excusi davant de vautres de pas aver acapitat per lo moment sus la question de la mediatizacion oblidada dau nòstre ensenhament, un pauc esconduda dirii, sus lo fach que lu poders, li instàncias e la premsa an sovent virat lu uèlhs a costat dau fach que 75% d’escolans qu’emparan una lenga regionala lo fan dintre l’ensenhament pùblico, a costat dau fach que l’article censurat de la lei Molac concernissiá lo pùblico, a costat dau fach que la circulara non tracta de la question dei mejans especìficos, de la question de l’egalitat republicana entre acadèmias e aquela de la formacion e dei concorses. Mas desesperi pas que posquessiam avançar sus aquelu sujèctes e lo travalh que siam a menar emb l’OPLO n’es una solucion.

Sus la nòstra accion amb la FLAREP

Au defòra de PQVNL dont demandam despí longtemps qu’un debat de fons sigue menat vist lu interès divergents que nen cau assumir tra toï lu membres, la FELCO s’es tenguda disponibla per la FLAREP. La preocupacion de la FLAREP, coma la nòstra, portèt tanben naturalament sus la lei Molac e la circulara. La question de la rapresentativitat de l’ensenhament pùblico es pas un problèma aquí. Mas la decepcion existe tanben per causa dei disfoncionaments au nivèu de la direccion de la FLAREP, au nivèu de la presa de decisions, au nivèu de la consultacion. La FELCO, quora es afiliada a una federacion e sòcia d’una estructura, demanda d’èstre consultada e associada ai decisions sobretot quora aqueli son polìtiqui. Se m’en donatz lo mandat, ai l’intencion, au nom de la FELCO, d’èstre de mai en mai present per que la nòstra votz sigue considerada per lu nòstres partenaris.

Las zònas d’ensenhament sinistradi

Es aquela consideracion que mena la FELCO a pensar ai collègas que si senton solets en de zònas d’ensenhament sinistradi, sensa convencion, sensa gaire de collègas per si motivar, sensa sosten polìtico e/o associatiu. Podem pensar ai acadèmias de Granòble, de Clarmont e de Limòtges mas cau pas oblidar tanben de despartaments sinistrats e que si tròvan dintre d’acadèmias que son pas en retardi per cen que tòca a l’ensenhament de la lenga d’oc.

Vòli dire en aquelu collègas que la FELCO li laisserà jamai tombar, que seràn jamai solets en lo sieu canton e que, a cada còu que s’es presentat, avem jamai mancat de tirar l’atencion dei nòstres interlocutors sus la situacion d’aqueli zònas sinistradi. La FELCO passèt un bòn moment de l’audiéncia au ministeri lo 7 d’òctobre darnièr a evocar aquela question essenciala de l’egalitat republicana. Lo camin es encara lònc mas de motieus d’esper si fan vèire, lo recampament d’un CALR a Granòble au mes de novembre per lo primièr còu despi d’annadas n’es la pròva, tant coma l’accion recenta menada dins aquesta acadèmia en concertation entre lo CREO e l’IEO.

De ligams amb las organizacions sindicalas

Aquelas acapitadas son tanben la resulta dau ligam que tratenem emb lu sindicats, que la relacion n’es essenciala per tota avançada en la defensa dau servici publico.

La FELCO tenèm a interpellar las organizacions sindicalas de las accions menadas e de lor demandar sosten e ajuda.

Contunhar de faire abans, totes ensems

Per contunhar lo trabalh entamenat dempuèi mai de 30 ans, en mai de la mieu contribucion au CA despi 15 ans, la mieu accion a la presidéncia de la FELCO, emb la volontat de m’endralhar darrièr l’acapitada dei mieu predecessors, troverà de sens sus quauqui annadas en aquèu nivèu de responsabilitat e solament se la vòstra confiança es aquí.

Rapòrt d’activitat de legir sus : http://www.felco-creo.org/07-01-21-raport-dactivitat-2021/

Rapòrt financièr : http://www.felco-creo.org/01-01-22-bilan-comptable-felco-2021/

Rapòrt financièr

Presentacion deu rapòrt financièr. Escambi sus la cotizacion deu CREO Tolosa. Dralhas prepausadas per amassar los escotissons.

Los 3 rapòrts son votats a l’unanimitat

Eleccion deu CA venent e deu burèu :

Eleccion del CA : en mai dels collègas qu’an candidatat abans l’AG, MJV demanda als presents se vòlon participar al CA. Joan-Francés Courouau accepta.

Los membres elegits al CA

1. Fabienne Albert – 1^er gra – Montpelhièr
2. Jennifer Baret – 1^er gra -Niça
3. Lionel Cayrol – 2^nd gra – Tolosa
4. Silvan Chabaud – Universitat – Montpelhièr
5. Cecila Chapdhuelh -2^nd gra – Tolosa
6. Marie-Anne Chateaureynaud – INSPE – Bordèu
7. Joan-Francés Courouau – Universitat – Tolosa
8. Bruno Duranton – 2^nd gra – Tolosa
9. Denis Galvier – 1^er Gra – Montpelhièr
10. Tomàs Hirondèla – 2^nd gra – Bordèu
11. Estèla Lame – 2^nd gra – Montpelhièr
12. Felip Martel – Universitat – Montpelhièr
13. Frederic Martron – 2^nd gra -Niça
14. Cristòl Menassol – 1^er gra – Tolosa
15. Gilbert Mercadier – 2^nd gra – Tolosa
16. Matieu Poitavin – 2^nd gra – Ais
17. Maria-Joana Verny – Universitat – Montpelhièr

Los delegats academics

AELOC (2 delegadas)

18. Maria-Francesa LAMOTTE (1er gra)
19. Sarah LAURENT (2nd gra)

APLR (2 delegats)

20. Jeremia MARCAIS (1er gra)
21. Olivièr PASQUETTI (2nd gra)

CREO Aquitània (2 delegats)

22. Clamenç Masseillou – 1^er gra
23. Audrey Peymoulié – 1^er gra

CREO Auvernha (1 delegada)

24. Laura Bonnet – 1^er gra

CREO Daufinat-Vivarés (2 delegats)

25. Gerard-Joan Barcelo – 2^nd gra
26. Valeria Pasturel (2^nd gra)

CREO Lengadòc (2 delegats)

27. Benaset Bolano – 1^er gra
28. Julian Konopnicki – 2^nd gra

CREO de la Talvèra

29. Patrici Roques – 2^nd gra

CREO Tolosa (2 delegats)

30. Virginia Lago (2^nd gra)
31. Jean-Baptiste Courcelle (1^er gra)

Lo CA es votat a l’unanimitat manca una abstencion.

Burèu

• President : Olivier Pasquetti
• Clavaire : Bruno Duranton
• Clavaira adjunta : Laura Bonnet
• Co-secretàrias : Virginie Lago e Marie-Jeanne Verny

Le burèu es votat a l’unanimitat

Discussion

Mandats

Olivièr Pasquetti merceja Patrici Roques del trabalh fidèl e menimós que fai del seguit de l’APLV : es exemplar dins lo biais de faire la ligason amb la FELCO.

Un pichòt malentendut es esclargit sul mandat donat a Cecilha per representar la FELCO dins lo Congrès. Son compte rendut èra partit a una lista qu’èra pas la del CA, ni la del burèu. Fisança es renovelada a Cecilha.

Olivier rend compte de la dificultat del trabalh al dintre de la FLAREP. Malgrat un investiment leial e ancian (la FELCO es membre fondator de la FLAREP) i sèm pas escotats. Lo president e lo secretari general agisson solets. Una discussion s’endralha sul biais de melhorar las causas… MJ es sceptica… En 30 ans de participacion activa a la FLAREP, e malgrat trabalh, investiment, res es pas estat possible. Es prepausat que los collègas de la FELCO participen nombroses al collòqui venent en Bretanha. Proposicion de MJ que la FELCO ajude per aquò (lo CREO Lengadòc o farà tanben per sos sòcis).

Olivièr demanda un mandat au CA per escriure una letra au subjècte del foncionament. Aquesta proposicion es acceptada

Dins « Pour que vivent nos langues », l’ambient de trabalh es positiu, las idèas de totes son presas en compte (cal dire que la FELCO trabalha de longa, escriu tèxtes, corregís, seguís l’accion). Es complicat pasmens de faire respectar l’ensenhament public a la mesura de çò que representam… Los elegits e la premsa aurián aisidament tendéncia de veire pas que l’ensenhament associatiu.

Lo trabalh amb l’OPLO es saludat : 3 acamps se son tenguts per portar de revindicacions al delai de la circulara.

*Mandat PQVNL : MJ Verny.

Lo psdt merceja tanben Felip Martel e Gilbert Mercadier de lor ajuda.

*Mandat APLV : Patrick Roques :

Los rapòrt amb l’APLV son plan bons, publican tot plen d’informacions (http://www.felco-creo.org/14-01-21-2021-lo-trabalh-collaboratiu-amb-laplv/). Pasmens per alestir l’avenir, per P. Roques, caldriá pensar de faire dintrar qualqu’un mai a l’APLV per lo remplaçar un jorn. Cal 2 ans d’adesion abans de poder faire partida del CA.

*Mandat Congres : C. Chadeuil

*Mandat Flarep : O. Pasquetti

Comissions

Primari

Un acamp se debanèt visio. Fabienne qu’anima la comission crenta d’èsser pas pro eficaça (pasmens, lo rescontre foguèt saludat al cors d’un CA de la FELCO). Fabienne se sentís mai d’aver un ròtle de referenta per ajudar lo monde. Li sembla mes eficaç d’organizar d’acamps pichons sus de punts plan precises. Idèa es donada de faire una tièra de questions problematicas e d’organizar d’acamps tematics.

Collègi

La comission collègi s’acampèc un còp en visio puèi contunhèt lo trabalh per corrièl.

Las proposicions de la comission collègi

Aquestas decidions son plan solide sotmesas au CA de la FELCO. Las causas de faire son despartidas amb un referent a cada còp (o quasi) mas los collègas pòdon prene las causas en camin e s’investir/ajudar suls punts que vòlon.

• Au nivèu FELCO : Puntejar l’estatut de TZR. Voldriam aver una vista dels pòstes d’estagiaris a l’abans de la rentrada, e demandam una soscadissa collectiva au dintre de la FELCO au subjècte de la perenizacion dels pòstes.
• Mutualizacion : Julien, Tomàs e Virginia s’encargan d’ensajar la platefòrma VIAEDUC e de s’auto-formar. Referent : Tomàs.
• Occitan a l’orau deu DNB : demanda als nòstres IPR per que fagan una letra. Los encoratjar a botar dins la cadenas los IPR de LVE.
• Creacion d’un argumentari de portar al dintre dels nòstres collègis. Referent : Julien.
• Creacion d’una bòstia a utís militanta : Dropbox + Site FELCO. Ont plaçarem los diferents documents prepausats dins aqueste CR.
• Iniciacion generalizada 6^na opcion : demanda d’integrar l’iniciacion generalizada dins las convencions. De discutir al dintre de la FELCO.
• un libròt clau en man als collègas. Julien e Virginia se n’encargan.
• Prepausar un document de bon adobar per lo recrutament de las opcions : Virginia (creacion d’un document de bon modificar sul siti Canva)

Amassada seguenta : dins la setmana deu 1^er au 6 de julhet. Benleu tanben se véser pendent l’Estivada de Rodès.

Question pausada per la referenta de la comission : Coma transformar l’ensai e far créisser las idèas e lo qu’espeliguèron de la comission.

Responsa deu president : portar mai fòrt las causas en tot insistir suls punts precises e essencials en CA.

Licèu

La comision s’amassèc un còp.

INSPE

Un ligam es estat creat entre Marie-Anne Chateaureynaud avec des collègues d’Ais e de Montpelhièr.

Privat confessionau

Un acamp telefonic se debanèt.

Un mot de la Region amb Benjamin Assié, mercejat per Olivièr Pasquetti

Es totjorn interessant d’assistir a las AG de las associacions que vos convidan, es una pròva de fisança e tanben de volontariat de trabalhar amassa,ditz Benjamin Assié que fai un petit CR de la debuta de son mandat (6 meses).

Tre la debuta de junh, Caròla Delga escriguèt per èsser recebuda als 2 deputats – Euzet e Kerlogot – per poder afortir qualquas posicions importantas de la Region : que m’immersion siá tanben possibla dins lo public e que las convencions sián renoveladas amb la necessitat de respècte dels engatjaments de la part de l’Educacion nacionala. Intervenguèt tanben sus la question essenciala dels mejans.

Benjamin Assié diguèt la volontat de butar sus lo conselh nacional de las lengas previst per CASTEX e de demandar que siá interministerial (e pas reservat a l’Educacion nacionala).

Intervencion tanben per l’aplicacion de l’article 7 de la lei Molac amb los mejans necessaris. Aquesta batèsta dels mejans es fondamental de la menar dins los qualques meses que venon

Benjamin Assié es estat sensible a la demanda dels collègas de las acadèmias en defòra de l’OPLO e compta plan de se tornar investir per una charta interregionala e transfrontalièra. E mai se l’OPLO es pas que 2 Regions, dins l’OPLO i a l’Estat e es una rason per pausar la question de l’espaci occitan tot.

Eleccions presidencialas

PQVNL es a apitar un questionari ende les candidats a l’eleccion presidenciala. La mira es d’aprochar cada canda candidat. La FELCO diu cercar e trobar membres de cada còla electorala ende tocar les candidats. A cada nivèu nos calerà donc solicitar les nòstres elegits ende que posca pujar.

Nos cau tanben pensar a un questionari aus deputats ende las legislativas.

Question divèrsa

Creacion d’una adreça creo/felco.

Una adreça creo·felco nos hè mestièr. Marie-Jeanne aurà sonque besonh d’una ajuda tecnica dambe quauqu’un que passe au son ostau per

• Crear una adreiça FELCO-CREO
• L’implantar sus son compte thunderbird sens pèrdre d’informacion.

Site internet

Le CREO Tolosa faguèt la demanda de rafrescar un pauc lo site internet de la FELCO. S’agís subretot d’una question de refençament, d’imatge qu’èra de mal cambiar quan partajam ligams sus las rets. Voldrián tanben faire evoluir un pauc l’estetica deu site.

La question es estada pausada abans l’AG per poder l’aprestar e i soscar, d’elements de responsas son estats portats. Lo referençament es pas tant michant qu’aquò, fin finala. Arribam en tresena posicion… Lo problèma d’imatge de mal cambiar es estat adobat mercés a Georges Souche. Per çò de l’estetic, cal portar demandas precisas per veire çò possible o pas. Virginia a escrich au CA deu CREO Tolosa per que  de demandas claras sian emesas. Pas cap de retorn fins ara.

Creacion d’una comission rets sociaus.

Responsables : Julien Konopnicki e Benoît Bolano.

Proposicion de reprene la polida costuma de las AGs e dels repaisses partatjats a Rodés

[1] http://forumdoc.org/fr/ : recampa AELOC, APLR, Calandreta, Felibritge, IEO