L’associacion Terrairòl edita dempuèi 2017 una agenda escolara occitana que permet de perlongar un pauc lo trabalh quotidian de la classa. Coma dins tota agenda, i a las paginas « linhadas » per i escriure (lo trabalh de far, las causas de desmembrar pas, los afars de portar…).
Pels periòds de vacanças, i a de paginas ludicas, amb de recèptas, de bricolatges, de poesias, de tèxtes…etc… Los jorns feriats son explicats e d’aicí d’ailà se pòt trapar d’autras informacions…
Lo principi es de publicar sonque de contenguts liures de dreits o amb l’autorizacion expressa dels e·de las autor·as e/o dels ostals d’edicion, dins diferentas variantas d’occitan, mas tanben dins d’autras lengas (ligat al programa Familhas de Lengas, menat dins d’unas escòlas).
Cada annada, la cobèrta es signada d’un artista conegut/da e reconegut/da e ligat/da d’un biais o d’un autre a la lenga occitana. De còps, l’artista es mai que ligat/da : un vertadièr engatjament ! Aital, agèrem l’astre de poder mostrar als enfants d’òbras de Ben, Claude Viallat, Hervé Di Rosa, Isabelle Marsala, Joan-Carles Codèrc …
Per 2024-2025, mercé al sosten e l’ajuda del Musèu eponim de Rodés e a l’autorizacion de Colette Soulages, serà una reproduccion de la Serigrafia n°1 de Pierre Soulages.
Lo nombre de tiratges es limitat, sus comanda. Ça que la, per 2024-2025 n’avèm tirat (e vendut e/o distribuit) 1300 exemplars !
D’une/as collègas ne crompan o fan crompar per una classa tota, d’autre/as daissan la causida als escolan/as. Dins d’unas escòlas, l’agenda es ofèrta en fin d’annada als CM2 que partisson pel collègi.
Prepausam de modèls diferents per cada zòna escolara, per fin de respectar las datas de vacanças dins la mesa en pagina. Los noms dels jorns e dels meses, e los tablèus de conjugasons son diferents d’un modèl a l’autre (gascon, lemosin o lengadocian per la zòna A, provençau per la zòna B, lengadocian per la zòna C).
A despart d’aquò, totes los contenguts son identics e multivarietals : un tèxt arribat en gascon, serà publicat en gascon dins los diferents modèls ; una poesia en provençal, serà publicada en provençal per tot lo monde, una recèpta en lengadocian, o serà d’una zòna a l’autra, tant coma un bricolatge en lemosin…
Per respondre a la demanda d’unes adultes, prepausam tanben una version « sens vacanças », amb 52 setmanas de setembre a setembre, de presentacion un pauc diferenta mas amb de contenguts meteisses.
Telecargar lo butletin de comanda : bon-comanda-agenda-2024-2025
Se pòt veire aquí :
- modèl « escolar » : https://www.calameo.com/read/00669174760f7905c1434?authid=Yr95CeoIDoba
- modèl « sens vacanças » : https://www.calameo.com/read/006691747138cd51fc8ff?authid=APZwrPXEOfTy
