Un contèxt nacional de dialòg… mas sensa avançada màger
Per lo darnièr rapòrt moral sota la presidença d’Emmanuel macron que presentam aquí, l’illusion creada per li tres audienças au ministeri dont la FELCO participèt non càmbia la dòna. D’efet, a tres moments tra lo mes de març e lo mes d’abrieu dau 2026, la FELCO foguèt presenta carrièra de Grenelle, un còu en l’encastre de la FLAREP, un còu en lo sieu pròpre nom, un còu embé PQVNL per remembrar li nòstri revendicacions existenciali o ligadi à l’actualitat. De mejans ministerials especifics, la requalificacion de l’estatut dei lengas regionali en l’encastre dau DNB, la question de la formacion dei mèstres, lo nombre de pòstes au CAPES e a l’agregacion, li modalitats d’aplicacion de l’article 7 de la lei Molac rapresentan tant de demandas qu’avem portadi embé fòrça e d’un biais argumentat mas que demòran ancuèi sensa efet nimai consequenças. Mai qu’aquò, lo corrièr que lo ministre Geffray nos faguèt parvenir (https://www.felco-creo.org/03-04-26-postes-aux-concours-du-second-degre-le-ministre-repond-a-la-felco/) lo 3 d’abrieu en seguida d’una solicitacion nòstra per nos explicar d’una manièra lacònica e lenifianta qu’avem ja pron de pòstes duberts au CAPES e a l’agregacion es una ilustracion dau dialòg mut e balord que tratenem embé l’Estat despí ahura tant d’annadas. Maugrat la reduccion dau nombre de parlementaris sus luquals podem cuntar, la FELCO a un còu de mai obtengut lo sosten de depuats e senators durant l’annada passada (http://www.felco-creo.org/27-06-26-les-questions-des-senateurs-et-senatrices-concernant-les-langues-regionales/ e http://www.felco-creo.org/26-06-26-les-questions-des-deputes-concernant-les-langues-regionales/). Aquelu elegits, qu’avem solicitats sus tres dorsièrs diferents despí lo mes de ceembre recevon generalament de respòstas dau ministeri que pròvan un còu de mai la rompadura tra lo governament e lu actors d’un territòri. L’entrevista qu’avem auguda lo mes passat – al moment del collòqui FLAREP al País basc – embé lo senator Brisson afortisse lo constat que fasèm e que podèm regretar de parlementaris lests à nos ajudar e nos sostenir mas que cercan elu tanben lo biais de faire audir li nòstri revendicacions. Sus lo 2026, la nòstra accion au nivèu nacional foguèt doncas mai prolìfica que d’autri annadas, la frequença de la relacion embé lo ministeri e lu elegits mai granda, mas sensa resulta importanta.
L’accion embé lu nòstres partenaris
Aquesta mancança d’avançada màger, la partajam en l’encastre dau travalh ric e essencial que menam embé lu nòstres partenaris. L’APLV non a mancat de portar li nòstri demandas quora si rendet au ministeri. L’intervencion comuna efectuada embé lu nòstres partenaris d’OCBI sus lo departament d’Òlt mòstra la reactivitat collectiva que podem portar mas illustra l’efet limitat de la nòstra accion faça a una administracion barrada. Au dedintre de la FLAREP que ven de cambiar de president, ensajam aquí tanben de tratenir un rapòrt de fòrça embé lo ministeri au servici de l’ensenhament pùblico. L’anulacion de l’audiença prevista au mes de genoièr embé lo conselhièr dau ministre solament quaranta-vuèch oras denant marca un mespretz dei mai grands, tanben se en seguida de l’intervencion de deputats, aquesta audiença si tenguèt finalament doi meses mai tardi. Lo travalh e la contribucion de la FELCO au dedintre de l’associacion Pour que vivent nos langues son considerables, tant sus la regularitat de l’investiment au travès dei visiòs organizadi doi còus cada mes coma sus d’escasenças precisi coma l’audiença dau 12 d’abrieu qu’aquela associacion obtenguèt au ministeri. Au Congrès de la lenga occitana dont participeriam a la renaissença dau Consèu dei Usatgièrs, la FELCO es lesta a contribuir per l’evolucion d’aquel otís que nautres ensenhaires, porriam emplegar en l’exercici dau nòstre mestièr. Per autre, en l’encastre dau travalh que menam embé l’OPLO, semblava essencial de li faire saupre coma l’avem fach oficialament au mes de decembre passat li nòstri crentas e li nòstri reservas sus lo projèct de renovelament de la convencion-cadre. Ancuèi, segon li remontadas qu’avem de quauqui seccions acadèmiqui, sembla tanben que li declinasons acadèmiqui d’aquesta convencion-cadre que son a s’elaborar serián mai concreti e pertinenti en terme d’objectieus e de visions. Enfin, oblidam pas en la nòstra accion lo sosten tant modest sigue a l’evenemencial. L’ajuda, tant umana, logìstica coma financiària a l’Estivada e a La Passem mas tanben lo sosten joves occitanistas de Carrièras Occitanas que si tenguèron aquest an son recampament a Montsegur fa part dòu relarc d’accions dont la FELCO deu èstre presenta.
Vida intèrna
Au moment d’acabar aquèu rapòrt moral, lo president que sieu si regaudisse dau ligam que la FELCO pòu aver d’un biais interacademic embé l’ensem dei CREO(s), AELOC, APLR. Ancuèi, pas una soleta seccion acadèmica demòra muda e vòli aquí rengraciar lu rapresentants academics e lu membres dau CA per lo seguit qu’an assegurat un còu de mai aquest an. En fonccion dei sujèctes, avem continuat de ciblar lu destinataris dei messatges e autres mails per ensajar d’evitar de tròu cargar de preocupacions lu collègas investits. La letra regulara de la FELCO mandada en newsletter es aquí per assabentar cadun de cen que si passa. Saludi la reactivitat de toi lu membres dau CA lo lònc de l’annada, reactivitat que permete de menar una òbra collectiva intelligenta e pertinenta. Enfin, vòli soslinhar la jiòia e lo bonur qu’ai a travalhar embé lu membres dau burèu que m’ajudan au cada jorn per faire au mai ben, embé li mieu qualitats e mai que mai lu mieu defets en l’interès collectieu, totjorn en cercant a segre la dralha traçada per lu mei predecessors Yan Lespoux e Felip Martel.
