20-01-23 Rapòrt moral FELCO 2022

Lire le rapport au format PDF : 2301-20-rapòrt moral

Lo 2022 es estada una annada rica d’escasenças que pòdon aver de repercussions sus l’ensenhament de l’occitan. Tra votacions nacionali, renovelament de la convencion-cadre sus lo territòri de l’OPLO mas tanben premièra rintrada escolara despí la circulària ministeriala consequéncia de li contestacions de la lei Molac, l’accion de la FELCO foguèt ritmada segon lo calendari cargat que si presentèt.

OPLO e convencion-cadre

Un travalh seriós e regulièr foguèt menat embe l’OPLO e elaborat a l’entorn dei doi subjèctes màgers que son l’après-circulària e lo renovelament de la convencion-cadre. Per aqueli doï subjèctes, de motius de satisfaccion, tanben d’esperança e de còus de decepcion demòran. La satisfaccion ven de la confiança relacionala, de la permanéncia de l’escambi, dau partatge d’informacions essenciali e mai que mai dei ponchs comuns que pòrjon una vision similària tra OPLO e FELCO. Vòli aquí saludar lo travalh dau President Armand, dau vici-President Assié e dei servicis tecnics de l’OPLO. Lu dorsièrs qu’aurem da tractar en lo 2023 e bensai encara mai tardi ligats essencialament a l’après-circulària son de factors d’esperança tant siam tombats d’acòrdi sus li prioritats per fins d’imaginar d’avançadas concreti per lo nòstre ensenhament. En aquel encastre, l’idea pensada aquest an sus l’estatut dei ensenhaires que siam deurà èstre clarificada per la nòstra associacion per fins de contribuir au messatge da mandar sus cen que volem. Aquela collaboracion embé l’OPLO, maugrat la bòna volontat dei partenaris que siam e la confiança mutuala mi fa pas oblidar la decepcion deuguda au silenci dau ministèri despí lo mes de novembre sus lo travalh comun menat per lo renovelament de la convencion-cadre. Espèri que li seccions academiqui de la FELCO seràn consultadi au moment dei declinasons rectorali tant coma esperam concretizar la reflexion e lo travalh menats per li acadèmias fòra dau territòri de l’OPLO.

Li votacions nacionali dau 2022

Lo 2022 foguèt una annada marcada per li votacions presidenciala e legislativi. Sus aquò, la FELCO a fòrça contribuit a l’elaboracion e a la difusion dau questionari dau collectiu « Pour Que Vivent Nos Langues » mandat ai candidats a l’eleccion presidenciala. Per cen que tòca ai votacions legislativi, vòli aquí saludar lo travalh fargat denant li votacions per recensar lo mai de candidats possible, extrèma-drecha bandida, sus mai o mens doi-cents circonscripcions de l’espaci d’òc, l’interpelacion de mai o mens cinc-cents candidats e sobretot lo travalh de secretariat menat après li eleccions per classificar d’una part lu deputats qu’avian votat la lei Molac e d’autra part aquelu qu’an respondut a la nòstra interpelacion. D’aquí un tablèu que serà una basa de donadas preciosi per la legislatura que ven de començar foguèt elaborat, tablèu que n’ajuderà per sollicitar lu deputats en un avenir pròche.

Relacion embé lo ministre de l’Educacion Nacionala

A rapòrt au nòstre ministre, siam acostumats despí d’annadas de pas aver de respòstas ai nòstri sollicitacions o demandas d’audienças e quora n’avem, es plus besonh de metre en avant lo caractèr laconic o lenifiant d’aqueli respòstas. La darnièra interpelacion dau nòstre ministre sus la diminucion dau nombre de pòstes au CAPES n’es una bela illustracion. Pura, lo cambiament de ministre au printemps 2022 avia laissat augurar una milhora relacion embe la carrièra de Grenelle quora un mes après la nòstra demanda d’audiénça fogueriam reçuts. L’ensem dau burèu de la FELCO a poscut aprofitar d’aquela occasion per insistir sus li discriminacions que conoisson li lengas regionali dintre lo sistèma educatiu, l’inegalitat republicana que ne patisse l’occitan au regard dei autri lengas regionali o, dintre de l’espaci occitan tra li acadèmias situadi sus lo territòri de l’OPLO e aqueli que li son pas, tra li acadèmias que dispausan d’una dotacion rectorala e aqueli que n’an pas, tra li acadèmias que duerbon un CRPE especial e aqueli que lo prepausan pas, tra lu despartaments que son ajudats per lo travalh d’un CPD e lu autres que demòran sensa estructuracion dins lo travalh de complir. La mesa en evidénça d’aqueli discriminacions e d’aquela inegalitat republicana, illustrats per exemple per l’absença de l’opcion lenga regionala au CRPE, foguèron dichs mantun còu e la FELCO aprofitèt d’una audiença de la FLAREP a la DGESCO tres setmanas fa per lo tornar dire. E serem totjorn aquí per lo remembrar. Aqueli doi audienças embé lo ministèri foguèron tanben l’ocasion de remetre ai nòstres interlocutors un dorsièr seriós, complet e precís sus la situacion de l’ensenhament de l’occitan. Mercegi lu collègas que permetèron a la FELCO, coma cada còp qu’es recebuda, de presentar d’elements serioses, de donadas verificadi e ensin, de faire pròva de professionalisme. Malurosament, l’absença de respòsta ai doi darnieri demandas d’audiença au ministèri de setembre e de novembre son pas de bòn auguri per lo 2023 mas, comptam ben de contunhar d’interpelar regularament lo Ministèri.

Lu partenaris

Aquela sollicitacion dau ministèri es tanben un travalh collectiu embé lu nòstres partenaris de l’ensenhament coma la FLAREP e l’APLV coma aquelu qu’esperlongan l’accion mai luenh de l’ensenhament coma lo collectiu PQVNL e lo Congrès. Lu rapresentants de la FELCO dintre aqueli estructuras permeton un ligam permanent embe lu partenaris e promòvon lo travalh e li revendicacions elaborats per lo CA de la FELCO mercé ai mandats que li son confidats. De còus, de falhiments persiston tanben en lo foncionament d’aquelu collectius e aurem a còr d’estre constructius e positius per faire espelir d’accions totjorn mai fòrti en l’interès de cadun. Aqueu travalh en amont dau CA portat pi per lu nòstres rapresentants a permés d’acapitadas en aqueli entrepresas collectivi mas a permés tanben de remembrar l’especificitat de l’ensenhament public de l’occitan ai interlocutors divers quora si tracta dei subjèctes mai generals. Justament, sus aquela especificitat, la coordinacion permanenta de la FELCO embé OC-BI e lo seriós e lo professionnalisme d’aquela associacion de parents ajudan fòrça per dire cen que volèm. Li ocasions de collaborar embé OC-BI an pas mancat au regard de l’actualitat rica dau 2022 e vòli precisar aquí que podem cuntar sus un partenari mai que fidel, credible e pertinent sus cada subjècte que nen concerna. Lo collòqui de la Flarep que si passerà à Nissa en octobre dau 2023 serà una occasion de mai per mostrar qu’ensem siam mai fòrts.

La FELCO ten tanben a establir un dialòg embé li organizacions sindicali representativi. 2022 èra tanben una annada d’eleccions professionali e n’avèm profitat per mandar un questionari ai sindicats nacionals e tanben ai sieu seccions academiqui. Rengraciam tanben lu collègas qu’an apuejada aquela accion au dedintre dau sieu sindicat. Lo resultat foguèt une bèla ramada de responsas embé rampèl dei mandats de congrès e compte-rendut de li accions menadi en li acadèmias

Vida intèrna

La realizacion de tot aqueu travalh seriá pas possibla sensa l’ajuda dau cada jorn de mantun.a collèga, dau burèu, dau CA e tanben d’aquelu que, sensa ocupar una posicion oficiala, si manifestan d’un biais pertinent quora senton que pòdon portar una peira a l’edifici. Es ben aquí la nòstra chança de poder cuntar sus li fòrças de cada seccion academica mercé au relai dai rapresentants academics au CA e dei collègas que difusan e espantegan tota informacion o crida essenciala a la vida de la FELCO. La tenguda en presencial de doi acamps dau CA, en mai a Montpelhièr e en julhet a Rodés, devon encoratjar lu collègas a retrovar lo plasir de si veire e de si rescontrar, lo plasir de la convivialitat e de l’escambi vertadièr. Aquesta convivialitat que v’encoratgi a alimentar mi fa pas oblidar toti li marcas de patiment de mai en mai numerosi e exprimidi per lu collègas au regard de pràcticas managieriali noveli, a la solitud ressentida, a li situacions pessugui que podem rescontrar. La FELCO farà totjorn cen que porrà per parar a tota manifestacion de destressa d’un collèga.

Per illustrar e afortir aqueu prepaus, lo rapòrt d’activitat enumera un quarantenau d’accions o de temas travalhats en lo 2022 cen que rapresenta sus l’annada una mejana de tres-quatre accions per mes embé tot cen que li es ligat: de la preparacion a la consultacion dau CA en passant per lo relai embé la basa de cada seccion academica, dau retorn e dei remontadas fins ai restitucions e difusions dei informacions e mai que mai, a la concretizacion.

En tant que president, fogueri vigilent a la presa en consideracion de cadun. Vòli rengraciar aquí lu rapresentants academics per lo sieu ròtle essencial en la transmission tra lo CA de la FELCO e l’ensem dei collègas de cada seccion academica. Gramaci tanben ai collègas que, en complement d’aqueu foncionnament associatiu asseguran en lo sieu nom una diffusion larga dei informacions de la FELCO. Gramaci a la fidelitat dai collègas qu’an acceptat d’èstre au burèu embé qu si passa pas un solet jorn sensa escambi. Saludi enfin lu mieu predecessors au pòste de president de la FELCO que m’an donat envuèia de presentar ancuèi aquèu rapòrt davant de vautres.

Olivièr PASQUETTI, president de la FELCO

Ce contenu a été publié dans Vida intèrna. Vous pouvez le mettre en favoris avec ce permalien.