12-01-21 – Rapport moral FELCO 2020

PartagerShare on FacebookTweet about this on TwitterShare on Google+

NB : aquel rapòrt moral serà sotmés al vòte de l’AG del 16 de genièr de 2021.

Gaire de cambiament dempuèi la darrièra AG

Dempuèi l’arribada de Jean-Michel Blanquer al ministèri de l’Educacion nacionala en 2017, se pòt dire que, fòra los eveniments de la vida intèrna de la FELCO, nòstras amassadas generalas nos reservan pauc de suspresas. E doncas, lo rapòrt moral per 2020 cambiarà pas gaire de los de las annadas precedentas.

Los efièches de la reforma dels licèus

Coma o fasiam ja remarcar per 2019 e 2018, la refòrma del licèu e del bachelierat escranca nòstre ensenhament en licèu. O sabiam en 2018, comencèrem de lo véser concretament en 2019 e, dempuèi la dintrada de 2020 podèm melhor mesurar l’ample dels degalhs en licèu que se venon apondre a los que ne patiguèrem pel collègi dins las annadas del quinquennat precedent.

Lo Ministre als abonats absents…

Fisèl a son biais de faire, lo ministèri contunhèt de refusar las demandas de rendètz-vos que foguèsson portadas per la FELCO ela-meteissa, per la FLAREP o per lo collectiu Pour que vivent nos langues (PQVNL). A una sola represa la FELCO, representada per son co-secretari, Olivièr Pasquetti, posquèt presentar la situacion al nivèl ministerial : èra lo primièr d’octòbre de 2020, quand la FLAREP foguèt convidada per la DGESCO. Acamp estèrle ont cadun demorèt sus sas posicions e ont ni lo ministre ni un membre de son cabinet venguèt pas, mostrant que per el la question èra pas qu’administrativa.

E pasmens, avèm pas quitat de li escriure

Avèm pasmens fòrça causas de dire al ministre e o faguèrem per corrièr mai d’un còp sens gaire de responsa autra que d’elements de lengatges (denonciats justament dins una letra a prepaus de las responsas faitas pel MEN a las questions escritas dels parlementaris). O faguèrem tanben a l’escasença de l’audicion de la FELCO per la Mission d’observacion sus la valorizacion de l’occitan ont rescontrèrem l’IGEN encargat de la lengas de França, M. Bernabé, e un Inspector general del minsitèri de la Cultura, M. Paumier. Malurosament, lo rapòrt d’aquesta mission, a destinacion dels dos ministèris, foguèt pas rendut public.

La pandemia de Covid-19 venguèt s’apondre a aquelas dificultats. Serviguèt, o podèm legitimament pensar, al MEN per nos pas respondre e, sul terrenh, entrepachèt fòrça los collègas per presentar l’occitan dins lors establiments e recrutar d’escolans.

La participacion al collectiu Pour que vivent nos langues

Dins aquel contèxt, la participacion de la FELCO al collectiu PQVNL foguèt una escasença per faire ausir nòstras revendicacions. Concretament, l’accion de PQVNL prenguèt tres vias : interpellacion del president de la Republica amb remesa d’un corrièr a l’Élysée en junh, manifestacions localas en octòbre, sosten a la proposicion de lei del deputat Paul Molac. Tot aquò balhèt un pauc de visibilitat a las lengas de França dins los mediàs mas subretot cap als parlementaris. Pasmens, PQVNL contunhèt de se trapar confrontat al silenci del MEN que respond pas a las demandas de rendètz-vos, quitament lo que lo president Macron li demandèt de prene amb lo collectiu dins la responsa al corrièr de PQVNL.

E lo primièr gra ?

La FELCO doblidèt pas la situacion dins lo primièr gra e, en collaboracion amb l’AELOC, mandèt a la tota debuta de 2021 un corrièr a prepaus de las espròvas d’occitan al CRPE. Doblidèt pas tanpauc la situacion de las academias « sinistradas » del nòrd de nòstre espaci. Es amb gaug que vegèrem lo CREO Auvernha redinamisat après lo de Granòble e que los ajudèrem dins lors demarchas al prèp de la DASEN de Cantal e per demandar una estructuracion seriosa e solida de l’ensenhament de l’occitan dins l’academia de Granòble. D’autant mai que, amb la signatura – enfin ! – de las declinasons localas de la convencion entre l’Estat e las regions Nòva-Aquitania e Occitania, l’inegalitat de tractament entre las academias contunha de s’agreujar.

La vida intèrna

Del costat de la vida intèrna, coma o foguèt decidit a l’AG de l’an passat, una commission de revision dels estatuts se metèt en plaça, menada per Clement Masseillou e Manu Isopet. Presentèt son trabalh a l’escasença de dos CA, en agost e en octòbre, ont sas proposicions foguèron discutidas per menar a la presentacion d’aqueles estatuts nòus a l’AG extraordinària del 16 de genièr.

Dins aqueles CA foguèt tanben decidit, en conformitat amb çò dit a l’AG precedenta, d’organizar nòstra amassada generala fòra region « Occitanie ». Mercejam los collègas de Niça qu’acceptèron de s’encargar d’aquesta organizacion quitament se la situacion sanitària empacha la tenguda fisica d’aquesta AG. Esperam de poder nos donar rendètz-vos a Niça l’an que ven.

O avèm dit, la FELCO contunhèt tanben de participar activament a PQVNL e a la FLAREP que nombre de sòcis de la FELCO e de sas associacions federadas participèron a son collòqui de Perpinhan.

A l’APLV tanben, participèt, ont es representada dins lo CA per nòstre collèga del CREO de la Talvèra Patrici Roques.

Per 2021…

2021 serà, ne’n podèm gaire dobtar, una annada critica. Los efèits mortifèrs de la refòrma del licèu e del bachelierat van se faire sentir d’un biais mai fòrt e deven essencial e quitament vital, de se faire ausir pel govèrn e la representacion nacionala. Dins aquel encastre caldrà contunhar de menar l’accion amb la FLAREP e PQVNL.

Caldrà pas tanpauc doblidar los autres nivèls. Sèm uroses de véser de collègas del primièr gra prèstes a s’implicar dins la FELCO e esperam ben que la commission primièr gra que foguèt installada l’an passat podrà foncionar aqueste an, tant coma, perqué pas ?, de commissions segond gra e superior.

Podèm esperar tanben que tot aquò se poirà faire dins un climat apasimat al dintre de nòstra associacion amb coma sola amira l’interés comun qu’avèm per la subrevida mas tanben lo desvolopament de l’ensenhament de nòstra lenga.

Yan LESPOUX, president de la FELCO, 12 de genièr de 2021.

NB : rapòrt moral de completar per lo rapòrt d’activitats en linha a l’adreiça http://www.felco-creo.org/10-01-21-raport-dactivitats-felco-2020/

 

 

 

Ce contenu a été publié dans Vida intèrna. Vous pouvez le mettre en favoris avec ce permalien.