I- Dijòus 07/07/22 : visio conferéncia de la FELCO amb lo Ministèri
Un dorsièr de 28 paginas es estat fargat per parlar de la situacion generala : http://www.felco-creo.org/wp-content/uploads/2022/07/2207-07-Audience-FELCO-Minist%C3%A8re-1.pdf
L’exemple de nòstra acadèmia : dins lo segond gra, una trentena de professors d’occitan son afectats, amb una granda part de lor servici dins la valéncia contra 50 qu’aviam a la debuta del millenari.
Son la màger part del temps afectats sus mantun establiment e devon far una autra matèria en mai de l’occitan. Dins lo CREO Lengadòc, patissèm de la manca d’un collèga referent del segond gra que poiriá portar la paraula dels collègas : dificil per lo burèu de saber exactament lor situacion e lors demandas : ensenhar son que l’occitan ? ensenhar tanben lor valéncia per faire mens d’establiments ? dificil tanben de saber exactament los servicis dels uns e dels autres per aver un punt de la situacion…
D’un biais general, a l’escala de l’espaci occitan, rescontram de dificultats de ressorsas umanas. Tròp pauc de candidats al CRPE e al CAPES. Ongan, al concors CRPE i aguèt 8 plaças, mas sonque 3 candidats son estats preses. Caldriá afortir lo dispositiu Ensenhar ? E benlèu ensajar de prepausar una iniciacion en occitan a totes los candidats que preparan lo CRPE ?
Çò demandat al ministèri : continuitat dins los cursusses d’occitan.
Un exemple dins nòstra acadèmia : los escolans marcats en classa bilingua fins al CM2 a Montpelhièr se retròban dins la situacion ont en 6ena an la possibilitat de prene l’opcion occitan mas se planhon de se retrobar en classa amb d’enfants que començan.
La còla dels ensenhaires de l’escòla Sévigné devon far una demanda cortesa a l’IPR per la continuitat al collègi… e benlèu prene lo temps d’un acamp de trabalh amb las ensenhairas de Clemenceau (NB : a la dintrada, Magali Fraisse aurà al collègi lo concors de Marion Lavergne, formada a l’UPV e mudada dempuèi l’acadèmia de Bordèu.
II- Bilanç del trabalh recent del CREO
II.1- Las adesions
An crescut de 20 % amb la possibilitat de pagar sul siti hello asso o per chèc dirèctament a la clavaira.
II.2- Jornada Total Festum de Narbona
I aguèt de mond e mai se l’endrech èra benlèu un pauc amagat del centre narbonés. La jornada foguèt plan diferenta de la de Somèire en 2020, que s’acompanhèt de la manifestacion « Pour que vivent nos langues ».
Avèm de segur regretada l’abséncia dels collègas de Narbona e d’Aude en general, levat la directritz de l’escòla de Carcassona, la venguda de Gèli Arbousset e lo polit talhièr d’escritura organizat per los joves collègas de l’INSPE. De remarcar la preséncia de regentas de calandreta que se mostrèron fòrça interessadas per lo rescontre. Los collègas presents tornèron contents de lor jornada. Los mercejam per lor bona umor e lor trabalh collectiu, e mai aqueles que, empachats de venir a Narbona, trabalhèron tota l’annada per la capitada d’aqueste moment pedagogic e convivial.
Avèm poscut mostrar nòstra preséncia als elegits presents, en nombre e a las diferentas personalitats :
- las 3 elegidas que prenguèron la paraula a la dubertura :
- Christine Dauzat, representant la comuna de NARBONA, comuna que nos faguèt fisança tre l’espelida de l’idèa
- Sandrina Sirvent, al nom de la presidenta del Conselh departamental Aude
- Catherine Bossis, al nom de Carola Delga, per la Region,
– e mai
- Joël Laporte, DASEN, representant de la rectritz, que passèt mai d’una ora amb nosautres, que prenguèt lo temps d’escambiar amb los collègas e veire lo trabalh de l’atalhièr d’escritura
- Benjamin Assié, en carga de las lengas catalana e occitana, retengut lo matin per la presentacion oficiala de Total Festum e lo lançament de l’operacion « Cultura viva » : https://jeparticipe.laregioncitoyenne.fr/project/plan-cultura-viva/questionnaire/enquete-culture-viva-grand-public.
- Yannick Callarec, director de l’Association des Maires, des Adjoints et de l’Intercommunalité des Pyrénées-Orientales.
- Vincent Rivière, cargat de mission a la Region, que venguèt faire un viston discret
– e mai encara, per lor preséncia amistosa e benvolenta.
- Cristòl Causse, encargat de mission IPR
- Jacques Bossis, IEN sus Narbona.
Mercejam los interveneires, dins l’òrdre
- La còla dels joves de l’INSPE per l’animacion de l’atalhièr d’escriuta
- Gisèla Naconaski, per son testimòni plen d’emocion
- Alan Roch, per sa generositat e son talent de contaire
- Marc Pala, per son erudicion passionada
- Laurent Cavalié, per son escota de la paraula viva del pòble e son biais de la restituir
II.3- E en 2023 en Losera ?
Nòstra collèga Joëla Rossignol, que fai lo ligam amb Losera al dintre del CREO, a plan avançada la preparacion de la jornada Total Festum a Maruèjòls. Las idèas son ja aquí. De segur que Joëla poirà comptar sus l’ajuda del burèu e mai de l’ensemble de l’associacion.
II.4- La jornada de la Region « Cultura viva » a SERINHAN
I èrem 3 presents pel CREO : Benaset Bolano, Cathy Ndiaye e Maria Joana Verny. Aguèrem cadun l’escasença de prene la paraula per presentar l’ensenhament public de l’occitan. La dinamica del plan « cultura viva » es evidenta : 3 conselhèrs regionals èran presents : Benjamin Assié, Jean Marc Biau e Maria-Alice Pelé, en mai de la municipalitat de Serinhan.
De notar que lo CREO es estat tanben representat dins los autres departaments per cada acamp « Cultura viva »
II.4- Los rescontres de Salinèla
Foguèron un succès tant per lo programa artistic e cultural coma per los escambis entre los participants. De notar una taula redonda fòrta en emocion amb las intervencions de mond d’endacòm mai venguts a la lenga.
III. Bilanç e perspectivas burèu CREO
M.J. Verny expausa los besonhs per que lo burèu foncione melhor e que los collègas actius pòscan èsser ajudats. Demanda que de candidaturas novèlas se presenten a l’AG venenta.
Robin Chouleur se pòrta volontari per ajudar Joseta Soliva per los comptes, coma co-clavaire.
Delphine Colras vòl plan ajudar al secretariat e far lo bilanç de las accions de l’annada.
Nos cal qualqu’un per far lo ligam amb l’ESPE l’an que ven : Robin prepausa Alexandre Pesson ?
IV- Trabalh d’estiu
Es evocada la demanda de participacion a Ensenhad’òc de dintrada e tanben a l’Estivada de Rodés
V- Un cafè occitan dubert als parents
Una collèga de l’escòla Francís Garnièr a fach part de son besonh d’un luòc sus Montpelhièr per parlar la lengar en defòra de l’escòla (ligason entre los ensenhaires, los parents e los que vòlon ausir e parlar). A Astruc ? Nos devon entresenhar per la fièra de las associacions per saupre se i a un endrech d’acamp possible.
VI- Fièra de las associacion en setembre 2022
B.B demandèt un cambiament de plaça per mai de visibilitat que l’an passat. Serem normalament sus la plaça centrala.
