Refòrma del licèu : Compte Rendut del rescontre amb la rectritz de Tolosa.

PartagerShare on FacebookTweet about this on TwitterShare on Google+

Vista del rectorat de Tolosa, carrièra Sant Ròc.

Divendres 21 de decembre de 2018, al rectorat de Tolosa, de 12h a 13h.

NB. Lire le compte rendu en français dans le document PDF en ligne : 1812-21-CR audience Rectrice Toulouse avec CREO 21 12 18

Objècte : L’occitan dins la refòrma Blanquer dels licèus.

6 Presents : Anne Bisagni-Faure (Rectritz de l’acadèmia de Tolosa), Olivier Curnelle (secretari general adjunt de l’acadèmia de Tolosa), Daidièr Agar (IPR Occitan Tls), Joan Tomàs (CREO Tls), Franc Bardòu (CREO Tls), Nicolau Rei Bèthvéder (pdt CREO Tls).

Ambient : Cortés, atentiu e dense en escambis.

Nicolau Rei Bèthvéder expausa la situacion de l’occitan en licèu :

  1. Nòstres elegits (que transmeton nòstres planhs e demandas), los CREOs e la FELCO non recebon cap mai responsa del ministèri. Los ensenhants d’occitan ne son enrabiats.
  2.  Los collègas, malgrat la darrièra letra de ligason de l’IPR d’Òc, an de mal a faire acceptar als provisors que l’occitan LVC pòsca èsser una LVB.
  3. Demandam l’egalitat de tractament de totes las opcions LVC. Lo latin es patrimonial, mas l’occitan e las lengas ditas « regionalas » fan partida, constitucionalament, del patrimòni nacional francés (Art. 75-1). Indicam que fòrt d’aiçò, anarem davant la justícia per o far valer s’o cal. Tanben, los liceans de l’acadèmia de Tolosa, dins las manifestacions de decembre de 2018, revendiquèron l’afortiment de totas las opcions, dins un principi d’egalitat.
  4. Los caps d’establiment espèran un senhal fòrt del rectorat per manténer l’occitan dins las opcions proposadas. L’occitan, sovent fòra DGH, sembla aver pas mai de finançaments.

  5. Los candidats liures non poiràn mai accedir a las espròvas del novèl bac.

  6. Joan Tomàs fa remarcar que los escolans del cursus bilingüe non pòdon veire cap a ont se dirigisson.

  7. Demandam a la Rectritz de trasmetre nòstra insatisfaccion davant l’evolucion anonciada al ministèri dont volèm una responsa rapida.

  8. Li demandam donc tanben de confortar lo manten de la politica rectorala tolosana, en favor de l’occitan, al prèp dels caps d’establiment.

La Rectritz respond :

  • Nos assegura que va trasmetre al ministèri nòstras demandas e remarcas. Nos indica que la refòrma es pas acabada e que « de marcas d’atencion per l’occitan seràn faitas pel ministèri pro rapidamentAuram de responsas.

  • Nos indica tanben que la linha budgetària, malgrat las modificacions de la carta de las opcions, non significa de ges de biais un demesiment dels fonses per l’occitan.

  • Lo ministre a una politica assumida subre las lengas ancianas. Es çò meteis tanben per l’occitan e sos ligams amb lo latin subre la politica academica.

  • A l’amassada dels caps d’establiment, que se farà en genièr de 2019, la rectritz recordarà clarament la politica en favor de l’occitan als personals de direccion.

  • Olivier Curnelle nos indica que lo volum global de l’envolòpa per l’occitan fòra DGH es causit coma mantengut per la politica rectorala. Los caps d’establiment non o sabent encara, pòdon demorar fregeluc quand lor parlam del futur. Las causas se deurián clarificar. I a 25 temps plens en occitan en collègi dins l’acadèmia e 12 en licèus. Seràn gardats.

  • Las opcions devon èsser assumidas financiàriament per l’autonomia dels establiments. Mas lo rectorat mantendrà çò d’existent coma o faguèt per la refòrma del collègi. Parla de «santuarizacion» de l’occitan.

  • Cercan al rectorat a manténer las classas bilinguas en collègi. Pels licèus, es mai complicat. Se mantendrà la seccion de La Vaur. Mancam encara d’un cadre legal per las seccions bilinguas en licèu. Sus 25 collègis que fan de seccions bilinguas en occitan, i a la possibilitat de faire de l’òc dins lo licèu de sector. A Fontsòrbas e Sent Lis, ont non existís, se farà lèu.

  • Al nivèl nacional, i a d’intencions afichadas en favor de las lengas ditas regionalas. Lo problèma vendriá del temps que nos caldriá encara esperar abans qu’aquel punt foguèsse clarificat — d’aquí un sentiment d’abandon o de mesprètz ?

  • D. Agar nos indica que la volontat generala de continuïtat territoriala dins las seccions bilinguas es mantenguda.

  • La concurréncia entre occitan e letras classicas, la senhalam a la rectritz, ja que pesa subre los collègis de zòna rurala. La rectritz reconeis que las doas disciplinas se fan mens concurréncia en zòna urbana. Torna dire que l’occitan a d’èsser associat amb lo latin en licèu e en collègi.

  • En aquesta refòrma ampla, la rectritz reconeis tanben que i va cal procedir a d’ajustaments ulteriors, del temps que se detalharà mai las dimensions realas de la refòrma.

CR de FB anotat per NRB.

Ce contenu a été publié dans Actualitats acuèlh, Actualitats CREO Tolosa, Contactes Rectorat Tolosa. Vous pouvez le mettre en favoris avec ce permalien.