Letra deu CREO Tolosa a la presidenta de l’OPLO e la responsa

PartagerShare on FacebookTweet about this on TwitterShare on Google+

M. Emmanuel Isopet,Président du CREO Tolosa @ : creotoulouse@gmail.com

Lo 22 d’abrial 2020

Dòna Charline Claveau-Abbadie

Presidenta de l’OPLO

 

Subjècte : comunicacion sus l’ensenhament de l’occitan en collègi

 

Dòna Presidenta

 

La nòstra associacion representa dempuèi mai de 50 ans los ensenhaires d’occitan de l’academia de Tolosa, de la mairala a l’universitat. Dins aqueles temps tant particulars, vos volèm desirar totes nòstres vòts de bona santat, a vos personalament, als vòstres e la vòstra còla.

Lo 9 d’abrial, mandèretz a totes los ensenhaires, via lor bóstia electronica academica, una comunicacion sul bilanç de l’OPLO per 2019, l’actualitat d’aqueste Ofici e un agenda.

Demest aquestas informacions, coma o podètz imaginar, la publicacion d’un fulhet d’informacion sus l’ensenhament de l’occitan al collègi foguèt remarcada pels nòstres aderents.

Sabiam qu’aqueste document èra en espèra dempuèi un moment e sèm uroses de constatar qu’es enfin a posita per totas las personas que se desiran informar. Es un polit document, atractiu e que fasiá mestièr.

Ça que la, qualques criticas se fan ausir. Per melhorar lo document, s’es encara possible, o pels trabalhs a venir, las vos comunicam.

D’en primièr, de collègas, ensenhant en collègi, regretèron la manca de concertacion ; auriam aimat poder participar a la creacion del document, o al mens ne poder far la critica abans sa difusion. Es probablament un element de prendre en compte per las comunicacions a venir. Un document, per èsser eficaç, deu aver l’adesion mai larga dels professionals qu’o podràn utilizar.

Sul quite document, ara.

-Lo visual, es agradiu, malgrat un tractament estranh d’Alaska sul planifèr. La causida de las colors se pòdon contestar : lo blu emplegat es un pauc fred. Nos aluenham del sang e aur occitan qu’a lo meriti de la simplicitat. Èra necessari de servar la carta grafica de l’OPLO per una comunicacion dins l’encastre de l’Éducacion nacionala? Enfin, d’unes aurián mai estimat una fotografia de grope puslèu qu’individuala. Son pas que de detalhs, mas que se pòdon ausir.

-Lo tèxte « perqué apréner l’occitan ? » es interessant. Auriam aimat mai de plurals dins la frasa « C’est une façon d’acquérir des connaissances, de partager une culture, une mémoire, des savoir-faire, une manière de vivre ». En fach, dins la cultura occitana, o sabètz, los biaisses de viure e las memòrias son divèrses entre Alps e Pirenèus.

-Balhar d’informacions sus l’ensenhament de l’occitan dins cinc academias, quand sabèm la disparitat de las realitats, es un trabalh delicat. Cal evidentament completar l’informacion generala d’aqueste fulhet per quicòm de mai precís ; per exemple, dins quin establiment podèm trobar aquelas modalitats ensenhaments ? Per respondre a aquesta question legitima, lo document remanda solament al site internet de l’OPLO. Es pas far ofensa al vòstre site que de dire qu’es pas dedicat a l’ensenhament de l’occitan e que qual i cèrca d’informacions sus la question ne trobarà pas gaire.

Enfin, aqueste document presenta de situacions idealas. O sabètz, la realitat de l’ensenhament de l’occitan son de proposicions d’ensenhament puslèu raras sul territòri e d’oraris pas totjorn reglamentaris. Los professionals que sèm, foncionaris de l’Éducacion Nacionala, ne patissèm cada jorn. Tanben, aqueste escart entre la situacion presentada per la brocadura e la realitat viscuda nos a macada.

Entre los parents d’escolans e l’administracion, l’intervencion de l’OPLO per far respectar l’encastre d’ensenhament de la lenga nòstra e lo desvolopar es desirat. Atal seriam uroses de poder parlar concretament d’un ensenhament de l’occitan en collègi dins l’academia de Peitius, o de las possibilitats de seguir totes las modalitats d’ensenhament al mens dins cada departament e que los oraris reglamentaris i siaguèsson respectats.

Sabèm qu’obram dins la meteissa amira. Tanben refortir los ligams entre los ensenhaires e l’Ofici nos sembla essencial per s’estalviar de non-diches e de malcontentaments. Aquò’s la tòca d’aqueste corrièr, per finalament èsser mai eficaces dins lo camin cap als nòstres objectius comuns.

En vos mercejant de la vòstra atencion, vos pregam de considerar, Dòna Presidenta, las nòstras respectuosas salutacions

Pel CREO de l’academia de Tolosa

Emmanuèl Isopet

president

_______

Reponsa de l’OPLO

Objet : responsa au vòste corrièr deu 22 d’abriu de 2020 pertocant au document

« L’occitan en collègi ».

Sénher President,

Qu’èi plan prés coneishença deu vòste corrièr deu 22 avril de 2020 ligat a l’utís de

comunicacion pertocant l’ensenhament de l’occitan en collègi recentament

publicat per l’Ofici public de la lenga occitana, e que vos en arremercii.

Que’m regaudeishi de constatar qu’aprovatz l’iniciativa e que lo document vos

agrada dens lo son ensemble : qu’avem d’efeit volut rénder aqueth document

atractiu entà los collegian tot purmèr.

Que formulatz totun un certe nombre de remarcas utilas. Mantuas haràn

l’objècte de correccions au moment deus tiratges futurs.

Atau, que mancaràm pas de corregir l’error grafica sus l’Alaska justament puntada

dens lo vòste corrièr, e hicaràm au plurau « mémoire » e « manière de vivre »

dens lo paragraf « perqué apréner l’occitan ? ».

Entà d’autas, permetetz-me de vos portar quauques elements de responsa.

Que lhevatz tot purmèr lo hèit que los collègas ensenhaires d’occitan qu’an podut

regretar la manca de concertacion e qu’aurén aimat participar a la creacion deu

document. Entà çò de la produccion de documents de comunicacion relativa a

l’ensenhament de l’occitan, sapiatz qu’avem constituit un grop de 4 conselhèrs

pedagogics deu purmèr grad e de 5 professors deu segond grad, gessits de totas

las academias deu nòste territòri, mes tanben de professionaus de l’ensenhament

de l’occitan comme l’equipa deu Cap’Òc, era-medisha formada d’ensenhaires.

Aqueth grop que tribalhè a l’origina deu procediment suu tèxte e la fòrma deu

desplegant sus l’ensenhament de l’occitan en collègi. En mei, vos prepausèm en

tant qu’ensenhaire e representant deus professors ahialats au CREO Tolosa

d’integrar aqueth grop de tribalh entà soscar suu futur desplegant qui concernirà

l’ensenhament de l’occitan au licèu, çò qu’avetz acceptat e que vos en arremercii.

La causida d’un grop de tribalh ressarrat que pòt estar contestat, mes

compreneràtz qu’es mauaisit de consultar l’ensemble deus 150 professors

d’occitan qui òbran en collègi. En efèit, ua consultacion atau qu’ei rarament

compatibla dab las exigéncias en termes de delais entà la produccion e la difusion

d’un tau document.

Entà totas las remarcas d’òrdi « estetic », convieneràtz qu’en la matèra, que i a

autant d’avis que d’individús ! Totun, certas relhèvan mei d’ua causida de

« representacions simbolicas » que d’estetica, e que s’ameritan shens nat dobte

de precisar-las. Atau, sus la causida de colors, qu’avem efectivament hèit ua

causida auta que la sang e aur, entà nos pas associar la lenga sonqu’a las colors

deu drapèu occitan. Qu’assolidam atau l’occitan com ua lenga a vocacion

universau shens l’embarrar dens un còde color, quitament si efectivament, aquò

que pòt estar ua concession hèita a ua « identificacion » rapida peu public.

Atanben, la causida d’un pertrèit mei qu’un grop qu’a per tòca de facilitar la

« projeccion » e l’identificacion en çò deus mei joens.

Entà çò deu decalatge frequent que lhevatz enter modalitats oficiaus

d’ensenhament e realitat deu terrenh viscuda per los collègas, que pòdi sonque

partatjar aqueth constat dab vos. Mes aquí se tracta d’un document de referéncia

qui dèu donc justament har la sintèsi deus dispositius legaus, quitament s’a còps

demòran objectius d’aténher dens certes establiments. Aquera causida que

significa d’aulhors que desiram pas qu’un document oficiau vienga « enterinar »

situacions de derogacions a la règla. Las situacions en question que hèn d’aulhors

regularament l’objècte au dentre de l’Ofici d’ua batalada dab l’Educacion

nacionau, com ac sabètz, era tanben membra de l’Ofici public de la lenga occitana.

Entà çò que va concernir la renviada sus siti noste, que prepausaré pas pro

d’informacions en matèra d’ensenhament : que partatgi lo vòste vejaire e l’equipa

de l’Ofici que tribalha actuaument a l’enriquir ; en aqueth sens, ua mapa

repertorient los establiments on se pòt apéner l’occitan qu’ei en cors

d’integracion. Lo ligam figura jà dens lo bilanç d’activitat 2019 de l’OPLO, e que

serà lèu en linha. D’autes contienuts que vieneràn completar las paginas

dedicadas a l’ensenhament suu siti.

Qu’espèri qu’aqueras precisions responaràn a la màger part de las vòstas

interrogacions e arremarcas. Lo tribalh qu’avetz produsit sus aqueth document es

preciós entà nosauts dens la mira de poder melhorar los nòstes supòrts, dens lo

nòste interés comun. Que partatgi dab vos lo heit que sia important de tribalhar

amassa e que demòri, Sénher President, a la vòsta escota entà escambiar tornar

mei sus aqueras tematicas s’ac desiratz a l’aviéner.

Na Charline CLAVEAU

Presidenta de l’Ofici public

de la lenga occitana


 

Ce contenu a été publié dans Actualitats CREO Tolosa. Vous pouvez le mettre en favoris avec ce permalien.