COMPTE RENDUT DE L’AMASSADA GENERALA 2017 DEL CREO DE L’ACADÈMIA DE TOLOSA

PartagerShare on FacebookTweet about this on TwitterShare on Google+

Dissabte 25 de novembre de 2017. Ostal d’Occitània de Tolosa.

Sala A. Perbòsc.10h10-12h35.

21 Presents : L. De Lorenzo, V. Lago, L. Gros, M. Castanet, JM. Sutto, N. Becvòrt, M. Julià, V. Ribièra, J. Ginestet, O. Capòni, N. Rei Bèthvéder, B. Duranton, M. Isopet, P. Escudèr, C. Menassòl, E. Barta, J. Konopnicki, D. Castaing, JB Courcelle, V. Basso-Lacroix, E. Brunòt.

14 Desencusats : M. Batbie-Castell, J. Thomàs, G. Cany, O. Berard, G. Mazenc, L. Coron, C. García-Cròs, Estève Clerc, A. Fournou, G. Mercadièr, F. Bardòu, S. Pujòl, JP Ferrèr, JF Courouau, Arno Krispin.

Abans de començar Vincenç Ribièra nos parlèt del siti Internet del Congrès Permanent de la Lenga Occitana e e de las diferentas aisinas que perpausavan als ensenhaires en insistissent sus la volontat de dialòg entre l’equipa del Congrès e los ensenhaires d’occitan.

RAPÒRT FINANCIÈR

(fait per Bruno Duranton e adoptat a l’unanimitat per l’AG)

Bruno Duranton nos presentèt lo rapòrt financièr del CREO de l’acadèmia de Tolosa. Las finanças son bonas : Avèm mai de 8000 euros sul compte. Cal notar que recebèrem una subvencion importanta d’un fons europèu e avèm donc un sòlde largament positiu. (véser en copia junta en PDF).

Aquesta bona santat financièra, apondèt lo president, nos permet de contunhar la politica d’ajuda d’intervencion dels estudiants als licèus e de completar la formacion dels neo-professors a l’E.O.E. dont se parlèt al rapòrt moral.

De notar, que lo president refusèt tota ajuda financièra del CREO de l’acadèmia de Tolosa per l’ajudar a pagar sa participacion al collòqui de la FLAREP en Guaiana en explicant que farà parièr amb la FELCO. Justifiquèt la sieuna actitud perque vòl que l’argent ane a la formacion dels professors novèls.

Enfin, la cotisa 2018 es de 10 euros/aderent. Es d’enviar, per chèc a l’òrdre del CREO, a l’adreça postala : Bruno Duranton, Résidence Les Cades, 32 avenue Jean Jaurès, 12100 Millau / Milhau.

RAPÒRT MORAL
(fait per Nicolau Rei Bèthvéder e adoptat a l’unanimitat per l’AG)

  • Gràcias a l’accion de Cecília Chapduelh, e a la volontat de M.J. Verny se faguèt un novèlsiti Internet comun del CREO de l’acadèmia de Tolosa / FELCO. I a tanben un Facebook del CREO academic e una lista de difusion (LD) per e-mail que fonciona plan.
  • Las bonas novèlas : creacion de l’agregacion d’occitan e lo subjècte de l’espròva d’istòria-geografia-EMC del DNB serà redigit en occitan, gràcias a l’accion del CREO de l’acadèmia de Tolosa.
  • Lo compte rendut (CR) de l’AG de la FLAREP en Guaiana, (CR ja difusat per la LD) : De notar, çaquelà, l’idèa d’un collòqui sus la formacion dels neo-professors en Alsàcia en 2018 e l’idèa d’un rescontre a l’Assemblada Nacionala sus la LR. L’idèa d’una lei minimala que legaliza l’ensenhament de las LR foguèt jutjada pertinenta vist lo contèxt actual.
  • CAEOC d’abrial (CR de Cecília Chapduelh ja difusat per la LD).
  • Problèma del non remplaçament dels professors d’occitan en SB. Lo CREO anèt véser l’IEN de Fontsòrbas, en junh, sus aquel sicut, ambe qualques resultats. Aquestes problèmas son mai frequents ara (SB de Plasença del Gèrs, per exemple). Es lamentable perque son sovent de congèts maternitat previstes longtemps a l’avança. Son deguts siá a una administracion opausada a l’occitan o siá a una marrida reparticion dels professors remplaçants entre departaments. L’afectacion dels estagiaris manca de logica.
  • Las situacions dels CPDs occitans dins l’acadèmia de Tolosa :
    • Gèrs: -1 > Marc Castanet expliquèt la complexitat de la situacion perque son sembla-CPDs dins lo Gèrs e serà dificil de trobar un remplaçant a Espinassa.
    • Arièja: -0,5 : Recuperèrem 0,5 pòste en 2016.
    • Tarn: -0,5 aprèp una partença a la retirada.
    • Hauts-Pirenèus : -1 : Sembla que i aja dificultat a trobar qualqu’un.
    • Dins l’Òlt, malgrat lo cambiament d’IA, amb la partença de Lecuivre, lo restabliment de C. Menassòl es pas encara fait. Las promessas de Lecuivre, amb la creacion d’una SB a Caors, èran mentidas nos expliquèt C. Menassòl > ACCION : Una letra a la rectritz en decembre ambe una demanda de RDV.
  • La dintrada 2017 se passèt sens tròp de problèmas aparents, a despart de las nominacions fantasistas dels professors de SB. Per exemple en collègi, una collèga d’occitan-letra se trobèt nomenada sul pòste d’una collèga d’occitan-IG. Lo CREO intervenguèt e calguèt gaireben un mes per arribar a una situacion normala. Çaquelà lo CREO se fa de pensaments sus la baissa de l’efectiu dels escolans en occitan al 2d grad.
  • Problèma collègi de Balmar. Nicòla Becvòrt nos expliquèt que vegèt una baissa de sas oras d’occitan mentre que l’efectiu èra important. Aquela diminucion de las oras en lenga d’òc ven de la principala. Davant l’inaccion del Rectorat, lo CREO escriguèt una letra, mas la situacion cambièt. ACCION > Davant las libertats dels caps d’establiment, que se permeton de mespresar l’occitan en se trufant de la politica academica per l’occitan, lo CREO enviarà una letra a la rectritz en decembre ambe una demanda de RDV.
  • Problèma dins las seccions bilinguas 65 : Escolans del CM2 aguèron de mal s’inscriure dins lo collègi qu’assegurava lo cors d’occitan. Lo CREO e Òc-Bi intervenguèron positivament. Regretèm la manca d’un CREO actiu en Bigòrra.
  • Bilanç del dispositiu d’ajuda als neo-professors ambe l’Escòla Occitana d’Estiu (EOE). Comencèt plan modèstament mas l’AG vòl contunhar sus aquela via en 2018 en afortissent lo partenariat amb l’EOE perque una melhora formacion es essenciala per aver mai de professors d’occitan joves.
  • Accions de cap als elegits pendent las campanhas electoralas legislativa e presidencialas amb letras e demandas al candidats. Un grand mercés a Gilabèrt Mercadièr que seguiguèt aqueles afars.
  • Dispositiu ligams entre d’estudiants de l’universitat e los liceans. Joèla Ginestet nos presentèt l’operacion. 6 estudiants d’occitan al Miralh anèron dins de licèus per presentar l’occitan a l’universitat. Lo CREO paguèt 50 euros a cada estudiant.
  • A l’universitat de Joan Jaurés (ex-Miralh) J. Ginestet parlèt d’una progression dels efectius en occitan (15 estudiants reals en 1a annada, 15 en master, escambi que fonciona plan amb Lhèida). Per contra, la situacion es marrida a Albi ont assistissèm a la liquidacion de l’occitan a la fac > Foguèt decidit d’enviar una letra l’universitat d’Albi per denonciar aquesta situacion.
  • L’ensenhament de l’occitan escòlas privadas catolicas nos foguèt presentat per Eric Barta e Vincenç Ribièra. Avèm encara qualques establiments : Sent Africa, Albi, Rodés, Milhau, l’Isla de Baish amb Nelly Pujòl.
  • Dictadas occitanas 2017 : Lo CREO de l’acadèmia de Tolosa s’i associèt coma a la dictada del país tolosan. Aquò permet de popularizar los professors d’occitan de cap als parents.
  • Modificacion del nom del CREO TOLOSA. Es una demanda del CREO 12. Foguèt remarcat qu’es pas necessària perque lo nom oficial es ja CREO de l’acadèmia de Tolosa e qu’utilizèm CREO Tolosa per facilitat. Ensajarem donc d’utilizar a l’avenir lo mai sovent possible lo nom de CREO de l’acadèmia de Tolosa.
  • Modificacion dels estatuts per un foncionament mès eficaç e representatiu, coma o farà la FELCO tanben. Lo CA que remplaça lo burèu pletoric qu’avèm ara al CREO Acadèmia de Tolosa.

«Foguèt adoptat a l’unanimitat aqueste apondon als estatuts qu’anullan totes los articles que concernissián lo Burèu e lo C.A. :

Art. sus l’executiu. Lo Burèu del CREO de l’acadèmia de Tolosa es compausat d’un president, d’un secretari, e d’un clavaire elegits cada an per l’AG. Totes que pòdon èsser segondats per un adjunt.

Art. sul Conselh d’Administracion (C.A.). Lo CA qu’es la vertadièra assemblada del CREO de l’acadèmia de Tolosa e qu’es consultada per Internet tot al long de l’annada, es compausat del burèu, mai de totes los presidents del CREOs departamentals (09, 12, 31, 32, 46, 65, 81, 82) mai de personas presentas a l’Amassada Generala annala (A.G.) que se vòlon portar candidat per representar los 3 grads (2 pers/grad). Es fixat un nombre maximum al CA qu’es de 21. Lo CA es elegit per l’AG cada an.

Art. sus l’Assemblada Generala (AG). L’AG s’acampa al mens un còp l’an, constituida pel Burèu sortissent e pel CA sortissent mai d’aderents fisics presents de l’acadèmia de Tolosa. Un aderent absent se pòt far representar per una persona fisica presenta. Cada persona fisica presenta pòt pas aver qu’una procuracion.»

  • Renovèlament del burèu per 2018 : 5 membres.
    • President : Nicolau Rei Bèthvéder
    • Vice-Presidenta : Laetitia Gros
    • Secretari : Manu Isopet
    • Secretari adjunt : Joan-Baptista Courcelle
    • Clavaire : Bruno Duranton
    • Clavaire adjunt : N’i a pas.
  • Constitucion del nòu C.A. 19 membres.
    • Nicolau Rei Bèthvéder (2d grad, burèu),
    • Laetitia Gròs(2d grad, burèu, 12),
    • Manu Isopet (2d grad, burèu, 82),
    • Joan-Baptista Courcelle(1èr grad, burèu),
    • Bruno Duranton (2d grad, burèu, pdt CREO 12),
    • Muriel Batbie-Castell (2d grad, 09),
    • Joan-Pau Ferrèr (2d grad, 31),
    • Marc Castanet (1èr grad, 32),
    • Estève Clerc (2d grad, 46),
    • Olivièr Lamarque (1èr grad, pdt CREO 31)
    • Ives Ariès (retirat, pdt CREO 32),
    • Olivièr Capòni (2d grad, pdt CREO 81),
    • François Leplus (retirada, pdta CREO 82),
    • Joan Thomàs (ESPE),
    • Eric Barta (Ens. Catolic),
    • Joan-Francés Courouau (Universitat),
    • Cristòl Menassòl (1èr grad, CPD),
    • Cecília Chapduelh (Internet).
    • Gilabèrt Mercadièr (retirat, pdt Congrès).

Lo 65 es pas representat fauta de candidats. I a pas de president(a)s pels CREO 09, 46, 65.

  • Questions divèrsas

Joan Thomàs pausèt la question escriuta que se parle de la remesa en question dins lo contengut e la forma dels concorses de l’ensenhament : una formacion a renovar (al mens pel CRPE) e una plaça de l’occitan al concors a tornar negociar > Violeta Basso-Lacroix tornèt portar la demanda de J. Thomàs pendent la discutida. Tròp de neo-PE prenon l’occitan per oportunisme. Foguèt decidat de ne parlar a l’AG de la FELCO perqu’es una demanda de portar al ministèri.

Joan Thomàs pausèt la question escriuta de l’estatut de nòstra lenga dins sa nominacion. Es que devèm acceptar o pas que siague totjorn nomenada « regionala » alara que sabèm plan çò qu’es lo contengut de la nominacion e doncas l’impact suls joves estudiants del pesquièr pels concorses ? > Una larga majoritat dels collègas de l’AG son pas d’acòrds amb J. Thomàs. Pensan que l’apelacion LR es vista positivament.

Foguèt pausada la question de la reforma del bac. Sembla que se’n va cap a un contaròtle de contunh en lengas. Nos caldrà demorar vigilent.

Enfin, foguèt pausada la question de l’accion de l’OPLO e de las nòstras relacions amb aqueste organisme. > Foguèt decidit de demandar un RDV amb Cristòl Larrocan.

 CR de Nicolau Rei Bèthvéder
pdt CREO de l’acadèmia de Tolosa.

COMPTES CREO TOLOSA 2017 (1)

Ce contenu a été publié dans Actualitats CREO Tolosa. Vous pouvez le mettre en favoris avec ce permalien.