Aquest acamp es estat puslèu tecnic, sus de questions de finanças, de mesa en plaça del trabalh d’estiu e de dintrada e d’organizacion intèrna de l’associacion.
- Presents : B. Bolano, D. Colras, J. Soliva, MJ Verny.
- Desencusada : M. Roussel
1- Ajuda als projèctes
Un detzenat d’ajudas als projèctes son estadas accordadas (https://www.felco-creo.org/30-01-25-lo-creo-lengadoc-ajuda-los-projectes-pedagogics/). Rampelam que per aver lo finançament cal mandar a la clavaira, Joseta Soliva :
- – lo RIB de l’establiment
- – la(s) factura(s) acquitada(s)
- – l’article per Ensenhad’òc (abans lo 14 de julhet)
1.1- La responsabilitat dels collègas
Rampelam que per la demanda de subvencion, cal prepausar un projècte finalizat, que ten compte dels differents actors qu’intervenon per que pòscan èsser pagats.
Lo portaire del projècte es responsable dels engatjaments financièrs que pren : lo CREO donarà sa subvencion qu’un còp recebuts los documents demandats
1.2- Per Ensenhad’òc
L’article es de mandar tanben a l’adreiça mail del CREO (creo.lengadoc@gmail.com) en plan seguir los punts detalhats dins lo mail del 18 de junh per facilitar lo trabalh de mesa en pagina dels collègas que se’n entrevan.
- L’article deu èsser redigit en occitan e acompanhat d’una version francesa.
- Cada version (occitan e francés) deu èsser mandada dins un document Word (.doc .docx o .odt), e pas en PDF.
- Se vòstra contribucion compren d’imatges :
- Los imatges devon pas èsser integrats dins lo tèxt.
- Devon èsser mandats a despart en format JPG de bona qualitat (pas d’imatges tròp compressats o pixelizats).
- Dins lo tèxt, cal indicar la legenda en italicas amb lo nom del fichièr (exemple : Los escolans davant lor realizacion – imatge2.jpg).
- En cas de documents tròp pesucs, vos convidam a utilizar WeTransfer o un servici equivalent.
- Data limita de mandadis: 15 de julhet de 2025.Tot article mandat aprèp aquela data risca de pas poder èsser integrat dins la publicacion.
- Per las personas qu’an recebut una subvencion del CREO, un article que presenta lo projècte finançat es obligatòri, es la contra-partida de l’engatjament associatiu
Vos remembram que la mesa en pagina e la relectura son realizadas de maniera benevòla, e que lo non-respècte d’aquestas règlas complica fòrça lo trabalh del comitat de redaccion. Mercé de jogar lo jòc, coma vos ba demandam cada annada.
Per nos faire arribar vòstre article o per tota question, mercé d’escriure a : creo.lengadoc@gmail.com
Subvencions « Max Roqueta »
L’an passat, la comuna de Montpelhièr nos aviá portada una ajuda financièira per la Jornada Total Festum.
Aquest an, una demanda es estada facha dins l’encastre de l’annada Max Roqueta.
Nos a permés d’ajudar lo projècte de l’escòla Sévigné per l’intervencion d’un artiste grafista, JF Couderc, en classa e del Collègi Clémenceau per una serada de lecturas teatralizadas
Lo trabalh del burèu
Un còp de mai se pausa la question del subrepés de trabalh pel burèu e de la necessitat que maites collègas s’engatgesson. Apèl es fac a las bonas volontats, e mai s’es per seguir un sector particular e limitat. Tota ajuda es planvenguda.
Comptabilitat e adesions
145 aderents al CREO e de bonas vendas de libres als differents endreches (Salinèla, TF Sant Ipoliti, …)
Per las adesions 2025 – 2026, anam incitar lo monde de preferir HelloAsso.
L’estiu del CREO
- Estivada de Rodez del 24 al 26 de julhet : preséncia e venda de libres
- Ensenhad’òc (de mandar abans lo 14 de julhet) : articles en version bilingues, mesa en pagina, mandadis version papièr + version internet. Trabalh coordonat per Benoit, amb l’ajuda de Lucie e Maria-Joana
La dintrada del CREO
Fièira de las associacions a Antigòna lo 7 de setembre
Avèm besonh de mond que se marcan per téner l’estand dins la jornada. Devèm far una grasilha amb d’oraris que serà mandada per mail
