Dins las environas de Massiac, vilòta del nòrd-èst de Cantal, lo mot « palhàs » designa çò que, dins lo Sud, s’apèla « bancèls » e « faissas », es a dire de culturas dins de ròdols penjaluts, protegidas per de parets de pèiras secas.
Dempuèi 30 ans, se i ten, en octòbre-novembre, una setmana de manifestacions economicas e culturalas ont la lenga occitana i ten sa plaça
Per la segonda annada consecutiva, los regents de l’escòla publica de Massiac, dins Cantal, trabalhèron amb, Laura Bonnet, la mèstra caminaira en occitan dins l’encastre de la Fèsta dels Palhàs. La tematica d’aquesta annada èra « la fèsta ». Lo trabalh per cada classa foguèt bastit a partir d’una fèsta calendària o de las fèstas tradicionalas : Nadal, Carnaval, la vòta, lo maridatge e los vestits de fèsta. En mairala, los escolans an trabalhat una istòria de tal biais que la poguèsson registrar en la contar. Del CP al CM2, s’agissiá puslèu de descubrir las tradicions a l’entorn d’aquelas fèstas, de cants, de danças, d’escotar de contes e de racontes. Lo trabalh dels escolans de cicle 3 èra bastit a partir de documents d’archius (fòtos, registres d’acte civil, afichas,…) eissits del fons departamental. Lo fruch de lor trabalh foguèt expausat pendent la Fièra de la poma.
