Mocion pel CREO 12 refusada per l’AG del CREO TLS

Mocion que lo CREO 12 presentèt dissabte 12-10-19 a l’AG a prepaus de la question de l’integracion dels ensenhaires « Calandretas » al dintre del CREO academic. Foguèt refusada amb 27 voses en contra, 5 en favor e 5 abstencions.

« Al CREO 12 sèm estats suspreses de veire que Calandreta poiriá dintrar dins lo CREO (e doncas a la FELCO e a la FLAREP). Sul terrenc sèm nombroses a trabalhar e partejar d’experiéncias pedagogicas pasmens nos demandam s’es lo bon moment per dubrir nòstra associacion a Calandreta:

1. Riscam de pèrdre nòstras afiliacion a la FLAREP e FELCO ;

2. Lo monde politic e mediatic es pauc avisat de l’existéncia d’un servici public d’ensenhament de l’occitan. Riscam de pèrdre lo trabalh d’informacions e de clarificacions efectuat en tornar en un estat de confusion ;

3. Rapòrt als nòstres collègas e sindicats, es que nos voldràn defendre, pausar de mocions dins las AG dels establiments, refusar de votar las DGH, faire de tractes e comunicats en nòstra favor quand saupràn qu’o fan tanben pel privat ?

4. Lo moviment Calandreta es estructurat en associacions departementalas, regionalas (federalas) e “nacionalas” confederacion ont de permanents salariats (personal non ensenhaire) gestionan son ensenhament. Nautres pecaires, avèm pas grand monde. Es per aquò que lo CREO existís amb sos membres que i fan un trabalh benevòl en mai que de son trabalh de professor.

5. Podèm aver de conflictes d’interés. Per exemple l’an passat qualques personas de calandreta venguèron participar a la manifestacion per la lenga, mas èra pas amb la meteissa tòca pr’amor que los avèm vist dins cap de manifestacion contra la refòrma Blanquer, refòrma que favoriza l’ensenhament privat de la mairala en obligant las comunas a pagar las estructuras privadas…

Per tota aquelas rasons demandam al CREO Tolosa de ben voler suspendre la decision presa a l’AG extraordinària de dubrir lo CREO als ensenhaires de Calandreta. En efièch la crisi que coneissèm nos deu pas far prene de decision dins la panica o dins l’urgéncia. E prepausam al CREO Tolosa de montar una comission per soscar a las consequéncias de l’integracion de Calandreta dins la nòstra associacion per tornar reorganizar un vòte mai tard (quand la situacion amb l’EN serà un pauc apasimada) ont totes los sòcis auràn totes los elements de reflexions.  »

Ce contenu a été publié dans Actualitats CREO Tolosa. Vous pouvez le mettre en favoris avec ce permalien.