CR de l’AG del CREO TLS 2018

COMPTE-RENDUT

DE L’ASSEMBLADA GENERALA 2018

DEL CREO DE L’ACADEMIA DE TOLOSA

Dissabte 10 de novembre 2018 a Tolosa, Ostal d’Occitània. Sala Antonin Perbòsc.

Debuta : 10h10. Fin : 12h30. Foguèt seguida d’un repais al restaurant « A taula ! »

26 Presents :

-del CREO TLS : L. De Lorenzo, V. Lago, O. Capòni, N. Rei Bèthvéder, M. Isopet, P. Escudèr, C. Menassòl, JB Courcelle, F. Bardòu, A.-C. García-Cròs, E. Pujòl, A. Alberge, G. Mercadièr, V. Lago, M. Mazars, C. Noilhan, J. Gorg, J.-F. Courouau, M.-S. Bòsc, G. Cany, P. Cames, A. Krispin, P. Sebat, J. Thomàs.

-Convidats : Daidièr Agar (IPR), Estève Cròs (OPLO), Clamenç Pech (ÒcBi).

I a 5 personas de mai qu’en 2017.

13 Desencusats : M. Batbie-Castell, J.-M. Espinassa, O. Berard, J. Konopnicki, Estève Clerc, F. Bardòu, S. Pujòl, JP Ferrèr, B. Duranton, M. Lagaly, M. Miranda, M. Castanet, Olivièr Lamarca.

1) Presa de paraula de Didièr Agar, IPR d’occitan sus la refòrma dels licèus.

Comença per rapelar l’utilitat del CREO puèi evòca lo projècte de refòrma del licèu. Lo tablèu comparatiu entre abans e aprèp la refòrma pròvan qu’es un cambiament « pauc favorable » a l’occitan.

La question del finançament especific d’aqueste ensenhament en licèu es estada pausada ; pel moment res de precís es pas arrestat mas sembla que lo sistèma seriá mantengut.

Cal absoludament crear l’occitan LVB dins totes los establiments ont l’occitan s’ensenha ja, en far valer la contunhetat.

Encoratja totes los ensenhaires a participar (dins la partida « expession liura ») a la consulta suls programas novèls. De novèls tèxtes son en preparacion per las lengas ancianas, cal donc far pression per melhorar la situacion per l’occitan. Cal en particulièr alertar los DASEN.

Atencion d’espaurugar pas lo public amb una comunicacion tot azimut catastrofista.

Quand i a blocatge amb un cap d’establiment o cal senhalar, via lo CREO, al Rectorat e tanben far remontar per la via ierarquica.

Pel bilingüisme, de tèxtes son a venir, mas tot deuriá contunhar.

2) Intervencion d’Estève CRÒS, director de l’OPLO

Rapèla l’istoric de l’OPLO, creat tres ans fa mas operacional solament dempuèi març de 2016. Rapèla tanben lo ròtle de l’OPLO sus las cinc acadèmias e son ròtle dins las convencions. Per Tolosa de negociacions son en cors per d’objectius chifrats ambicioses e realistas.

Senhala lo desvolopament d’Oc-Bi coma partenari, lo trabalh en ligam amb Canopé (cap de precisions pòdon pas èsser aportadas per ara sul projècte de revirada dels manuals d’istòria).

L’OPLO dobrirà un burèu a Bordèu e contunha son estructuracion.

Lo 28 de novembre publicarà son plan d’accion pel desvolopament de l’occitan, es a dire per augmentar lo nombre de locutors.

Una enquista lingüistica dins la region es anonciada abans 2020, sens mai de precisions.

Una question es pausada sus lo ròtle de l’OPLO per la senhalizacion bilingua dins los licèus, mas sens responsa clara.

Las criticas contra l’OPLO son nombrosas. Aital, l’universitat senhala qu’ongan a pas recebut cap de subvencion per l’occitan, al contrari de las annadas passadas. Estève Cròs ensaja de respondre que son de problèmas administratius, que l’universitat a pas demandat lo virament de las subvencions precedentas, que son doncas caducas.

3) Pèire Escudèr, vice president de la jurada de l’agregacion intèrna d’occitan.

Se felicita d’aquesta creacion, malgrat lo fach que son anóncia siá tardièra e que daisse pas que quatre meses de preparacion als candidats, malgrat l’impossibilitat per l’universitat de prepausar una formacion dins un temps tant cort e malgrat l’incertitud del nombre de pòste. 20 candidats son marcats. Espèran lo rapòrt de la jurada de l’an passat.

Las criticas son nombrosas, mas Pèire Escudèr senhala l’importància de la creacion de l’agregacion intèrna.

4) Lo rapòrt financièr

En l’abséncia de Bruno Duranton, lo clavaire, Lo president fa lo punt de la situacion financièra de l’associacion. Lo compte es positiu de 7228,88€, mas en baissa per rapòrt a l’an passat del fach de la participacion del CREO al pagament de 871,60 euros pels 4 estagis a l’EOE per de neo-professors.

En mai lo CREO paga l’adesion a la FELCO (300 euros) , a Convergéncia occitana (60 euros) e paga qualques fraisses de participacion a la FLAREP (139,53 euros). Lo president precisa que vòl limitar las còstas e se faguèt remborsament ongan que l’anar del viatge a Estrasborg al collòqui de la FLAREP e pas lo retorn.

Los fraisses bancaris son de 27 euros.

Lo president senhala que las cotisacions representan solament 180€, es a dire que fòrça membres de l’associacion son pas a jorn de lor escotisson de 10€.

Lo compte financièr es adoptat a l’unanimitat.

5) Lo rapòrt moral. Votat a l’unanimitat.

Lo president, Nicolau Rei-Bèthvéder evòca las accions menadas pendent l’annada :

-L’amassada amb lo rectorat lo 15.02.18

-las dificultats per de seccions bilinguas en collègi dins lo 31 e l’Isla de Baish,

-pel pòste de conselhièr pedagogic dins Òlt, benlèu aurem una solucion en 2019.

-las accions al prèp dels elegits sus la refòrma Blanquèr dels licèus .

-Relança del teatre en occitan en Hauta-Garona amb lo CD31 gràcias a Vergonhan.

-lo collòqui de la FLAREP en Alsàcia (10/2018)

-los problèmas de la SBs dins lo 65 e lo ròtle positiu d’Òc-bi sus aqueste afar en tot remerciant Clamenç Pech que prenguèt la paraula per precisar son accion.

-la participacion al CAEOC del 22/06/18.

-Joslèva lo problèma de la formacion dels neo-professors e la necessitat d’entretenir e melhorar los ligams entre licèu e universitat. L’universitat Joan-Jaurés farà conéisser los estudiants volontaris per anar presentar los estudis d’occitan en licèu d’aicí dos meses, e Nicolau organizarà las visitas. L’universitat rapèla qu’es dubèrta e que seriá urosa de recebre mai de gropes de liceans per visitar la fac.

L’accion del CREO per ajudar a pagar l’estagi de l’EOE als neo-ensenhaires es mantengut. Es necessari d’informar los estudiants e que se fascan conéisser al mai lèu.

-Olivièr Capòni puèi lo president parlan de la letra comuna del CREO 81 e CREO TLS fàcia a la temptativa de liquidacion de l’occitan a la fac d’Albi.

-G. Cany e JB Courcelle evoquèron lo problèma de la contunhetat de las SBs en collègi a l’Isla del Tarn. Lo problèma existís tanben entre lo collègi e lo licèu (ex : collègi de Sent Lis/ licèu de Fontsòrbas) que serà accentuat per la refòrma Blanquèr.

6) Rescontre ambe la rectritz

Lo 7 de decembre de 2018, la rectritz recebrà lo CREO per evocar los problèmas de la refòrma del licèu. Franc Bardòu e Joan Thomàs acompanharàn lo president. Après una rica discussion, los tres son mandatats per exigir una letra de la rectritz qu’obliga los provisor a acceptar lo cambiament de LVC e LVB. Seràn evocats lo problèma dels candidats liures (> Fontsòrbas per ex.) e la demanda d’egalitat en LVC amb lo Latin-Grèc

7) Aniversari del CREO Tolosa

En 2019, lo CREO de l’acadèmia de Tolosa festejarà sos 50 ans. I aurà al mes de novembre una AG, mas totes los ancians presidents seràn convidats. Tanben los autres CREO e se n’aprofiecharà per far l’AG de la FELCO en ajudant los participants que venguent de luènh. Lo ser serà un moment festiu, amb repais e concèrt. Totas las idèas son plavengudas.

8) Renovèlament del Burèu per 2019 : 5 membres. Votat a l’unanimitat.

President : Nicolau Rei Bèthvéder

Vice-Presidenta : Muriel Batbie-Castell (a partir de genièr de 2019)

Secretari : Emmanuel Isopet

Secretari adjunt : Joan-Baptista Courcelle

Clavaire : Bruno Duranton

Clavaira adjunta : Virginia Lago.

9) Renovèlament del CA per 2019 > 15 membres. Votat a l’unanimitat.

Nicolau Rei Bèthvéder (2d grad, burèu, 32),

Muriel Batbie-Castell (2d grad, burèu, 09),

Manu Isopet (2d grad, burèu, 82),

Virginia Lago (2d grad, burèu, 32)

Joan-Baptista Courcelle(1èr grad, burèu),

Bruno Duranton (2d grad, burèu, pdt CREO 12),

Joan-Pau Ferrèr (2d grad, 31),

Olivièr Capòni (2d grad, pdt CREO 81),

Joan Thomàs (ESPE),

Eric Barta (Ens. Catolic),

Joan-Francés Courouau (Universitat),

Cristòl Menassòl (1èr grad, CPD, 46),

Pascau Sebat (Internet).

Gilabèrt Mercadièr (retirat, pdt Congrès).

Pèir Cames (2d grad, 65).

10) Escotisson : Cal pagar 10 euros per èsser sòci del CREO de l’acadèmia de Tolosa al clavaire. Se fa amb un chèc a l’òrdre del CREO e en l’enviant a l’adreça postala : Bruno Duranton, Résidence Les Cades, 32 avenue Jean Jaurès, 12100 Millau / Milhau.

CR fach per Manu Isopet e Nicolau Rei Bèthvéder.

Ce contenu a été publié dans Actualitats CREO Tolosa, Non classé. Vous pouvez le mettre en favoris avec ce permalien.