Compte rendut Olivièr Pasquetti, president de la FELCO
La FELCO foguet audicionada per la mission que lo premier ministre confidet ai deputats Christophe Euzet e Yannick Kerlogot en seguida de l’avís dau Conseu Constitucional sus la lei de proteccion patrimoniala e de promocion de li lengas regionali.
Virginia Lago, cosegretaria e ieu, en tant que president rapresentavam la Felco. Lo format definit per lu deputats era un escambi a la maniera d’un question-respòsta, de còps demandavan un avís.
Mai que mai, es la question de l’immersion que lu preocupa e pensam que lo rapòrt que rendràn serà mai que mai centrat sus aquesta question.
Avem sentit, e parli sota lo contraròtle de Virginia, que lo conselh e lo ministèri an la crenta d’una comunicacion que si faria solament en occitan per cas de mesa en plaça de l’immersiu en l’Educacion nacionala. Avem jugat la carta de provar de lu rassegurar sus aqueu ponch en diguènt que per nautres, l’immersiu era sobretot mai de libertat pedagogica donada a l’ensenhaire que porria despassar l’estrict 50/50 dau bilinguisme. Per illustracion de la sieu crenta, nos an demandat se li escolas publiqui bilingui fasian la sieu comunicacion dapé dai parents ren qu’en occitan… Pura, n’avem sobretot aprofitat per faire passar li ideas e revendicacions de la Felco.
- prepaus introductius per presentar la FELCO mas sobretot per tirar l’atencion dei 2 deputats en sotentendent que l’ensenhament public de l’occitan es dont si tròvan lo mai d’escolans (mai o mens 65 000) e lo mai d’ensenhaires (mai o mens 5 000) en lo mitan de li LR, qu’es en lo public que podem tocar lo mai d’escolans e que la consideracion per lo servici d’educacion public deu estre mai que primoridala se vòlon faire quauquaren per li LR,
- rampel de li declaracions dau candidat macron en lo 2017
- reforma dau bac e demanda de mesa en aplicacion de li declaracions de Blanquer sus lo coeff 3,
- acadèmias sinistradi e demanda d’egalitat territoriala republicana per lo aut tra acadèmias de l’espaci d’oc,
- opcion lr au crpe indispensabla emb lu doï articles de la lei que tòcan l’ensenhament public
- demanda sus lu mejans finaciers e umans per la mesa en aplicacion de la lei molac (sobretot per lu doï articles que n’en concernan)
L’audicion durèt una ora.Avem mandat un corrièl emb lu documents qu’avem costuma de laissar ai nòstres interlocutors (dorsièr Felco+ tablèu dau bac+ declaracions de Macron en lo 2017).Un gran mercés a Virginia per la sieu presénça coratgosa, a Felip, Maria-Joana e Gilbert per la sieu ajuda.Resti a la vòstra disposicion s’avètz de demandas mai precisi sus aquela audiença.Diluns, rapresenterai la Felco dintre una delegacion Flarep que serà a son torn audicionada per lu doï deputats.
