21-05-22 – CA de la FELCO en presencial a Montpelhièr – compte rendut

Publié le 25 mai 2022 par Marie-Jeanne Verny

En preambul e en annèx : l’agregacion

la FELCO s’es batuda per la creacion de l’agregacion. Aquesta a permés a 6 collègas una progression de carrièra que lor èra refusada fins aquí. Podèm remarcar, un còp de mai, l’inegalitat de dotacion d’una lenga a l’autra, l’occitan a, en general, un pòste per an, siá al concors intèrne, siá a l’extèrne, çò qu’es fòrça mens que per d’autras lengas – còrs o basc. A la segonda session, avèm obtengut 2 pòstes. Dins lo plaidejar per aquò, i aviá lo nombre important d’inscriches (49) a la primièra session. Dempuèi, mantun collèga s’es descoratjat e a renonciat a l’inscripcion. Sèm aital privat de l’argument màger per demandar maites pòstes. Es donc important de suscitar a l’entorn de vos d’inscripcions e de dire als collègas que se presentèsson a l’escrich, e mai s’an pas agudas las condicions melhoras per trabalhar. Se pòdon tanben marcar a las preparacions dubèrtas a Tolosa e Montpelhièr, que se son mostradas plan eficaças fins aquí

Presents

Fabienne Albert, Virginia Lago, Estèla Lame, Sarah Laurent, Frederic Marton, Olivier Pasquetti , Matieu Poitavin, Marie-Jeanne Verny.

Desencusats 

Gerard-Joan Barcelo, Laura Bonnet, Lionel Cayrol, Silvan Chabaud, Marie-Anne Chateaureynaud, Jean-Baptiste Courcelle, Joan-Frances Courouau, Bruno Duranton, Denis Galvier, Tomàs Hirondèla, Felip Martel, Jérémy Marçais, Clamenç Masseillou, Cristòl Menassol, Gilbert Mercadier, Audrey Peymoulié, Patrici Roques.

13h15 : dobertura del CA per Olivièr Pasquetti. Acuelh dels participants. Rampèl sus l’importança de se tornar trapar en presencial.

  • I- Visual e comunicacion FELCO

  1. Lo site

Discussion a l’entorn de la demanda que foguèt facha pel CREO Tolosa a la darrèra AG al subjècte del siti de la FELCO. S’agissiá, mai que mai, d’evitar que sus facebook apareguèsse totjorn lo meteis imatge quand publicam un article. Per evitar aquò, cal metre, dins cada article, un imatge parlant. Aital es el qu’apareis, si que non, per defaut, es un tròç del bandèu, pas forçadament convincent.

Cambiar lo bandèu : 2 causas :

  • Lo cambiar en entièr supausa una refonta grafica, çò que còsta car e risca d’immobilizar lo site del temps de la refonta.
  • Cambiar d’unas fòtos al dintre del bandèu. Ne podèm parlar al grafista que faguèt lo site. Mas mèfi que la charta grafica del site es en ligam amb la charta grafica dels desplegants FELCO e CREO Lengadòc, concebuts après d’oras e d’oras de reflexion collectiva. Es qu’avèm temps de recomençar aquela mena de trabalh alara que cada jorn nos met dabans de toneladas d’òbra ?

Una causa que manca : crear una letra automatica que lo monde s’i abonèsse per aver sistematicament los novèls articles en linha.

NB : la clau per publicar d’articles pòt èsser donada a de mond volontaris per ajudar (pas tròp per rasons de securitat). MJ pòt formar lo mond volontaris : l’interès màger del site coma es es son ergonomia per los redactors. Metre en linha un article amb fòto pren de 5 mns a ¼ d’ora segon las competéncias.

Cal agachar lo budgècte per pagar qualqu’un que siá pagat per nos ajudar. Demanda facha a Bruno Duranton. NB : se la causa es pas estada prevista al budgècte previsional d’aquest an, i caldrà pensar per l’an que ven. Mas aver d’idèas precisas sus çò que volèm.

Entretemps, demandas de devís seràn fachas a Danís Chapduelh e a Georges Souche. Mas per aquò, caldrà listar amb precision las causas que van pas sul site e las far remontar.

2. Desplegants FELCO

Nos cal tornar far de desplegants. Ne n’avèm pas mai. Seràn a disposicion de cada CREO. Maria Joana los pòt recuperar a son ostal e los podèm, per exemple, distribuar a cada CREO a l’escasença de l’Estivada.

  • II- Legislativas

Lo questionari ven d’estar finalizat. Es estat validat per PQVNL. Es un document FRAMA : questionari en linha de remplir : Pour Que Vivent Nos Langues : élections législatives | Framaforms.org. Per ne saupre mai, legir l’article sul site FELCO.

La data limita pel retorn dels questionaris pels candidats es estada fixada al 31 de mai. La FELCO demandarà de perlogar lo delai que trobam tròp cortet.

Coma lo difusir ?

  • Se servir de facebook / messenger per escriure en privat als candidats. Exemple de messatge : « Bonjour, je me permets de vous communiquer le questionnaire aux candidats rédigé par le collectif national « pour que vivent nos langues » en vous remerciant de bien vouloir y répondre : https://framaforms.org/pour-que-vivent-nos-langues-elections-legislatives-1651481526»
  • Cadun manda als candidats de son parçan.
  • Nos podèm organizar per CREO. Cada CREO s’ocupa de sos departaments. Nos podèm donar 4/5 jorns. Cada CREO / AELOC / APLR agacha las candidaturas e cèrca adreças mèls a qual mandar lo questionari. Olivier prepausarà un tèxte per ajudar las seccions localas a ganhar en eficacitat (diluns).

III – ponch sus Flarep, PQVNL, Congrès, APLV

  •  1. APLV

Retorns regulièrs de nòstre collèga Patrici Roques, del  CREO de la Talvèra, abans e après cada acamp. Totjorn tant de consideracion al dintre de l’APLV per las lengas regionalas, lengas amb la mema dignitat que las autras

  • 2. FLAREP

La governança es pas gaire democratica mas las causas semblan d’anar un pauc melhor. Sembla que las demandas de rigor de la part del psdt de la FELCO bute d’autres collègas de reagir. Una idea de mandat permanent que serviriá de basa per cada representant de la FLAREP dins los acamps es estat prepausada mas manca encara de pertinença. L’idea e la filosofia del mandat semblan pas encara totalament compresas mas cal soslinhar aquela evolucion positiva.

Ça que la, la question se pausa d’anar en nombre au collòqui en Bretanha. Olivier rapèla que abans tota accion, cal saber qu’avèm pas qu’una votz, monde o pas. Ça que la, per lo rapòrt de fòrças, lo costat moral, poiriá èsser una bona causa e sometrem l’idea de montar en nombre als collègas de la Felco durant l’estieu. Veirem amb lo clavaire quina soma la FELCO pòt consacrar per ajudar los collègas participants. De veire tanben cossí cada CREO / AELOC / APLR pòt ajudar.

Data : del 22 al 24 octobre de 2022.Decidissem d’i anar nombrós. Farem la demanda als collègas tre l’estiu.

3. Pour que vivent nos langues – PQVNL

Se pausa la question de « rapòrt qualitat / prètz ». La FELCO trabalha fòrça, tant pels apòrts intellectuals coma per la preparacion de las accions. L’investiment de las autras associacions es mai… irregular… L’equilibre es de còps dificil de trobar entre una accion unitària (sus aqueste punt, degun pòt pas res reprochar a la FELCO, qu’a totjorn jogat lo jòc) e une defensa especifica de l’ensenhament public e de l’independéncia a regard de las formacions politicas (a la visio conferéncia amb Feltin-Palas, i aguèt una tempativa de recuperacion per lo moviment RPS). Es sovent necite de rampelar que PQVNL s’adreiça a totas las formacions politicas a despart, es evident, de la drecha-extrèma.

Se pausèt tanben la question de la manca de disciplina collectiva d’una compausantas (lo Forum d’òc) que, per las legislativas coma per las presidencialas, se permet de mandar als candidats un questionari diferent d’aqueste qu’es mandat dins totes los parçans e per TOTAS las associacions membres del collectiu. Aquò fai desòrdre, per lo mens !

Question de MJ (mandatada al dintre de PQVNL) : De qué nos / vos sembla donc prioritari de defendre au dintre de PQVNL ?

4. Congrès

Lo congrès (https://locongres.org/fr) èra, a sa creacion, un otís de reflexion e de regularizacion linguistica. A un moment, es vengut tanben, dins un socit d’unitat, una mena de federacion d’associacions amb de presas de posicions ideologicas. Tornam demandar que quand una posicion « politica » es presa, siam consultats perqué sèm membre.

Cecila, que nos i representa, a fach remontar la nòstra demanda.

  • IV- Dispositiu Mare Nostrum

Pauc de retorns. Sembla que sul terrenh los collègas son pas assabentats tròp. Sabem res suls mejans. Segurament que n’i a pas. Aquesta circulària, curiosament escricha, es sustot facha pel latin e per lo grec, coma o mòstra sa plaça dins la seccion « Langues et cultures de l’Antiquité ». Benlèu qu’es pas la pena de se batre al contra d’un novèl concèpte que tombarà lèu dins l’oblit.

Atencion tanben de ne pas estar contra-productius quan parlam de « favorizar » lo latin. Mare Nostrum poiriá tanben servir dins qualques establiments coma argument per cumular latin E occitan.

NB : lo CA a decidat de publicar sul site de la FELCO, dins la pagina « idées et débats » una analisi d’Emmanuel Isopet, del CREO Tolosa.

aplicacion dins las acadèmias : CALR ? Cargat de mission? Convencions?

D’unas academias an enfin podut acampar un CALR (Clarmont – Granòble).

Marselha e Niça : un per an.

Tolosa e Montpelhièr : Dos per an e de grops de trabalh despartamentals. A Montpelhièr, i a agut en un pauc mai d’un an, un cambiament radical de politica rectorala que s’impausa als DASENs. L’ambient de trabalh es fòrça constructiu, e mai se la question dels mejans demòra una empacha gròssa. La volontat politica d’unas instàncias (Region, dept Aude, vila de Montpelhièr) ajuda tanben.

Dins las acadèmias de Clarmont, Granòbla o Lemòtges, la situacion es gaire favorabla : pas d’IPR, un nombre limitat de collègas qu’ajuda pas la mobilizacion. Dins Cantal lo collèga del segond gra es solet sus 4 o 5 establiments. Per lo primièr gra, lo Rector a acceptat de donar un mièg-pòste, mas aquò basta pas. Seriá plan qu’ajan l’ajuda de l’IPR de Montpelhièr.

  • VII- l’après circularia: OPLO/ Flarep

I a un calendari precís de renovèlament de las convencions dins las acadèmias concernidas per l’OPLO, d’aqu’i lo mes de decembre normalament per tornar partir sus 2023.

Una causa importanta : los responsables politics an una idèa clara de l’ensemble d’òc, mai que mai de las acadèmias non concernidas per l’OPLO. En l’amira d’aquela convencion cadre da renovelar, L’OPLO a votat en acamp general lo fach de desmarchar tanben las regions que son pas sus son territòri de competencias.

L’OPLO consulta los CREOs e la FELCO per ajudar a la redaccion de la letra. En teoria, la FELCO serà sollicitada per l’OPLO (2 visiòs si son ja passadas) per jogar un ròtle de conselhièr e per fins de faire remontar un vejaire tecnic.

  • VIII- Congrès nacional SNES a Montpelhièr

https://congres2022.blog.snes.edu/

Preambul d’Olivièr PASQUETTI, president. La FELCO a pas de privilegiar un sindicat o un autre. Coma escrivèm a totes los partits politics (en defòra de la drecha extrèma), nos adreiçam a totes los sindicats. Demandam tanben als collègas membres d’un sindicat de nos faire remontar las posicions de lor sindicat concernissent las LR. Seràn publicadas dins la rubrica concernida.

La FELCO i èra convidada – es lo cas per cada congrès nacional, mas avèm pas totjorn la possibilitat de i anar – e a pogut portar un tèxt validat per lo CA.

Lo tèxt final votat per lo congrès vos serà comunicat tre que publicat. De saber que d’unes complements concernissent las lengas regionalas son estats defenduts per d’unas seccions academicas (Montpelhièr o Rennes, per exemple) e adoptats. Aqueles amendaments completaràn los mandats del SNES que son en linha sus aqueste ligam e que cal totjorn rampelar quand òm rescontra de cadres locals pas forçadament al fial (un sindicat a pas per vocacion unenca de s’entrevar de LR e òm pòt pas demandar als responsables locals de tot saber)..

Dins l’ideal, seriá ben d’èsser convidats als congrès de cada sindicat per fin de far avançar las causas pertot. De demandar en intèrne de cada sindicat per los collègas.

  • IX- Conseil National des Langues et Cultures Régionales

NB : la sola sorsa juridica internet trobada per aqueste conselh es aquesta, mas data de 2006  ! L’existéncia juridica del conselh creat ? reactivat ? per Castex es encara un pauc fosca. Sola referéncia internet : https://www.culture-nouvelle-aquitaine.fr/actualites/installation-du-conseil-national-des-langues-et-cultures-regionales/

La Felco es presenta dins aquèu conselh au travès de la FLAREP. Per lo moment, li es pas cap de document juridic (arrestat o circulària ministeriala) que regís la creacion d’aquel conselh.

Lo conselh s’es recampat un còp en abril. I aviá un representant per l’ensenhament public (Delobel, psdt FLAREP) e un per l’ensenhament associatiu (Peio, per Eskolim), 2 representants bascos. Un solet document oficial : una letra de mission de Castex per Paul de Sinety, DGLFLF.

Lo conselh a creadas 3 comissions : formation continue / Numérique/ Média et édition. La FLAREP s’es posicionada per las 3 comissions.

Afaire de seguir amb lo novèl govèrn…

  • X- Estivada – 21 – 23 julhet de 2022

Nos retrobarem sul temps de l’Estivada (https://www.rodez-tourisme.fr/offres/estivada-2022-rodez-fr-3650740/). Participarem a la conferéncia de premsa tradicionala coordonada per lo CREO Avairon

Aurem besonh de mond per l’estand, solide, mas tanben ensajarem de téner un CA dubèrt (abans o après ?).

***

Nos faguèt de ben de nos tornar trapar en presencial e nos sembla important de trobar ocasions per nos encontrar e escambiar, d’un biais formal o mens !

Los acamps que venon dau CA FELCO : a l’Estivada en julhet e en octobre en Bretanha.

Redigit per Virginia LAGO e M.J. VERNY, sotmés als presents e completat per lo psdt Olivièr PASQUETTI.

Ce contenu a été publié dans Vida intèrna. Vous pouvez le mettre en favoris avec ce permalien.