17-06-19 Compte Rendut rescontre dambe la rectora de Tolosa

Compte Rendut deu rescontre dambe la rectora de l’acadèmia de Tolosa

lo diluns 17-6-19 de 16:30 a 17 :40

Lo collectiu per l’ensenhament de l’occitan dins l’acadèmia de Tolosa (CEOAT) compausat de Patric Lasseube, secretari generau deu CEOAT, acompanhat de Nicolau Rei Bèthvéder entau CREO TLS, de Gilabèrt Mercadièr entau Congrès permanent de la lenga occitana e de JF Laffont de Convergéncia Occitana vejoc la rectora Anne Bisagni-Faure (ABF). Èra acompanhada d’Olivier Curnelle, secretari generau adjunt deu rectorat, e de Daidièr Agar, IPR ÒC que damorèc fòrça discret,  entà preparar lo CAEOC.

Bon ambient, seriós e cortés dambe quauques petits moments de tension.

Lo dialògue es restablit mès los problèmas de hons son pas encara reglats.

Rapidas presentacions de cadun.

La rectora, ABF, prengoc la paraula :

Ça digoc que i a ua totjorn ua volentat academica de desvolopament de l’occitan. Se limita a dar la prioritat entaus mejans a la seguida deu bilingüisme.

La rectora reconeish las suas errors dambe l’anonci de la supression deus mejans especifics entà l’occitan dins l’acadèmia de Tolosa en medish temps que la refòrma Blanquèr. Estón maishants en comunicacion. Mos assegura que pertot on i a escolans las oras son tornadas, çò qu’ei pas completament vertat.

Patric Lasseube tornèc díser los engatjaments del president de la republica en favor de las lengas regionalas e digoc l’inquietud deus elegits, quin que sia la color politica, davant la situacion de l’ensenhament en heurèr passat. I a un estacament vertadèr deus elegits entà la lenga occitana.

Nicolau Rei Bèthvéder se mostrèc content deu retorn de las oras entaus professors d’occitan e deu restabliment deu dialògue dambe la rectora. Çaquelà damòra problèmas de hons e poiram pas tornar víver la medisha situacion l’an que veng. Parlèc deu patiment que viscón fòrça ensenhants un còp l’anonci de la fin deus mejans especifics. Viscón aquò coma ua liquidacion. Èra inadmissible. Aquesta destressa existish tanben dins lo prumèr grad. Après insistiscoc sus l’importància d’aver candidats en nombre aus concors d’ensenhaire d’occitan. Sense liceans nombroses en occitan, i a pas d’estudiants, donc i a pas mès de professors d’occitan. Parlèc dambe insisténcia de la LVB Occitan qu’en realitat se hè quasi pas. Evoquèc d’EDS d’Occitan, anonciats tròp tardivament, e qu’èran quasi vueits. Pr’aquò, podèm pas damorar cantonats a la LVC.

Joan-Francés Lafont parlèc de las Calandretas, en raperar l’istoric e lo caracter pionièr de lor trabalh peu bilingüisme. Presentèc rapidament lo problèma qu’a lo collègi davant lo refús de la contractualizacion deus pòstes au collègi de Tolosa en 5a e 4a.

ABF, rectora :

Maugrat que l’EDS Occitan es vueit a Sant Africa, e que lo nombre d’escolans de L’Isla de Baish e Tolosa es shètre [9 liceans], s’engatja a manténguer los EDS Occitan.

Entà Calandreta explica que a pas los mejans, que negocia dambe París per aquò mès sembla prepausar ua contractualizacion deu collègi contra l’acceptacion d’avaloracion suu nivèu de francés en CP.

CEOAT : La delegacion hè arremercar qu’en calandreta es pas en CP mès un pauc mès tard que se pòt hèr ua avaloracion deu francés coma dins ua classa monolingua e qu’au Quebèc l’interés de l’immersion au benefici deu francés es plan conegut.

Gilabèrt Mercadièr digoc :

– sa hòrta inquietud, lo pensament deus ensenhaires, l’impression de las gents que pensan que i a pas mès de politica academica en favor de l’occitan;

– la necessitat deus mejans especifics d’occitan en parlar de la situacion en Aquitània e Bretanha on i son encara.

– que d’establiments, qu’an escolans, çaquelà barren…

Lo CEOAT parlèc, entre autas, la situacion de l’occitan deu collègi de St-Antonin-Nòble-Val

Digom tanben i a pas nada de draubida d’ensenhament bilingüe per la dintrada que veng.

Expliquèm encara un còp la necessitat de draubir en licèu la lenga B qu’es pas mès possible ara de la causir a l’inscripcion au bachelierat. D’uns establiments vòlen pas draubir l’occitan LVB e d’autes pòden pas. Es pas a la carta de las formacions e los escolans se pòden pas mercar suu formulari d’inscripcion.

 

ABF, rectora :

– Vòu pas restablir los mejans especifics e mès se i a mejans especifics dins d’autas acadèmias. La delegacion compreng aquí que lor supression es ua decision rectorala e pas ministeriala.

– Vòu pas forçar lo cap d’establiment deu collègi de St-Antonin (82) a manténguer l’ensenhament de l’occitan, pr’amor de rasons escuranhosas, maugrat escolans en nombre. La rectora ditz qu’es l’excepcion que confirma la règla… çò que mos sembla un precedent pas acceptable.

Pas de retorn deus mejans especifics hòra DGH en l’annada escolara 2019-20, mès la mesa en oras seràn mercada en occitan a l’interior de las DGH, Entà verificar lo respècte d’aquestes oras d’occitan i aurà ua amassada OPLO/Rectorat/CREO en octòbre o noveme.

Pas de draubidas de Seccions Bilinguas l’an que veng.

Barraduras deus licèus dambe efectius fòrça reduits en occitan, mès ua aumentacion deu 3 % de las oras d’occitan en licèu enguan.

Ua possibilitat a concretizar au CAEOC : L’occitan LVC se poiré prénguer en LVB. Los escolans de 2da poirén prénguer l’occitan en LVB e transformar la lor segonda lenga estrangèra en LVC. La rectora mos afirmèc que se i a problèmas, les cau senhalar.

Olivier Curnelle ajustèc que la transformacion de la LVC en LVB a la fin de la segonda e èra legala e que còsta pas arren de mès.

ABF : La rectora se ditz tanben estacada a l

a promocion de la latinitat en associar occitan e latin o dambe l’italian o encara lo castelhan. Concretament se diuré pas interdíser l’accès d’un escolan d’occitan a ua seccion europèa de castelhan per exemple…

Remarca deu CEOAT : los professors d’occitan l’an totjorn hèit mès se diuré demandar tanben aus professors de las autas lengas latinas e de latin la reciprocitat es a díser de prénguer en compte eres tanben l’occitan.

ABF : La rectora afirma la volentat rectorala de signar la convencions Estat/Collectivitats localas per desvolopar l’occitan, e notadament lo bilingüisme. Blocatge dambe lo Conselh departamentau deu 31 que vòu mès bilingüisme que la rectora dambe 0,8% de bilingües contra 0,6% d’ABF. Sembla ligar, çò qu’es estonant, signatura de la convencion e relança de l’ensenhament bilingüe.

Evoquèm, dambe insisténcia, lo problèma deu recrutament e de la formacion deus futurs ensenhaires d’occitan dambe l’anonciada baisha deus efectius en licèu. La rectora ditz que la refòrma serà « reajustada » se cau, l’an que veng, entà perméter de hèr montar los nombre d’escolans d’occitan.

Anonci de 8 pòstes au CRPE Occitan.

Se reconeish problèmas dambe los CPDs, e trobar regents entà contunhar lo desvolopament de las SBs, la rectora ne parlèc pas. Mos i calerà tornar au CAEOC.

Fin de l’amassada a 17h40, sens aver pogut agotat los punts a tractar, dambe la partença de la rectora a ua auta amassada. Lo secretari deu CEOAT balha a la rectora ua nòta de d’Òc-Bi e ua deus ensenhaires d’occitan de l’universitat mondina.

CR hèit per Nicolau Rei Bèthvéder, anotat e validat per la delegacion deu Collectiu per l’Ensenhament de l’Occitan dins l’Acadèmia de Tolosa (CEOAT)

Ce contenu a été publié dans Actualitats CREO Tolosa. Vous pouvez le mettre en favoris avec ce permalien.