NB. Aquel rapòrt moral s’apueja sus un rapòrt d’activitat qu’es estat mes en linha e comunicat a totes los collègas i a 15 jorns : http://www.felco-creo.org/2677-2/. L’anam projetar e comentar lèu fach las accions realizadas, amb vòstra participacion activa
La reforma dels licèus
Cronica d’un desastre anonciat
A l’Amassada generala de l’an passat, fasiam lo constat del desastre anonciat que representava la refòrma del licèu e del bachelierat e dels blocatges rescontrats a totes los nivèls de l’administracion : dins los establiments, los rectorats e al Ministèri.
Aqueles constats e aquelas crentas per l’avenir de nòstre ensenhament se son confirmats : i aguèt pas jamai d’atacas tan grèvas contra l’occitan al licèu e i aguèt pas jamai tant pauc d’escota de la part del Ministèri.
Lo ministre refusèt totas nòstras demandas d’audiéncia e, quand n’accordèt una a la FLAREP al mes de febrièr, foguèt per promòure la mesa en plaça d’un ensenhament de specialitat (EDS) de lenga regionala e refusar la possibilitat d’un alinhament del coeficient de l’opcion de LR sus lo de LCA.
Un rescontre al mes de junh a la DGESCO a prepaus del programa d’EDS per la terminala foguèt l’escasença de constatar l’improvizacion dins laquala aquel ensenhament se met en plaça.
Nòstra mobilizacion
Pasmens, la mobilizacion s’engimbrèt.
La manifestacion organizada pel CREO Tolosa lo 17 de febrièr foguèt una bèla capitada, tant coma la mobilizacion organizada pels collègas de Provença.
Aquelas accions permetèron, de còps que i a, de limitar un pauc los degalhs (ex. dels mejans especifics per Tolosa que semblariá que sián al mens provisòriament restablits. Cf. CAEOC del 15-01-20) e, subretot de mobilizar los collègas. Un mercé especial a Olivier Caponi per l’organizacion de las 2 canhòtas participativas, als collègas de Tolosa (Julian Konopniciki e Nicolau Rei-Bethvéder) o de Niça (Olivièr Pasquetti, qu’organizèron una montada collectiva a París lo 30 de novembre. e mercé als collègas de la Talvèra que faguèron çò que cal per que de drapèls FELCO permetèsson de nos identificar clarament al mitan del recampament.
Permetèron tanben, aquelas accions, amb los escambis regulars, per corrièr o sul terren, de mobilizar los elegits e d’alertar las organizacions sindicalas amb lasqualas, d’aquí d’alai, en foncion de l’investiment dels collègas, i aguèt convergéncia d’accion.
Per çò qu’es dels elegits, lo contact es permanent, que siá per de corrièls comuns, per de responsas PERSONALIZADAS a cada corrièl recebut, o per de contacts telefonics, sens comptar las manifestacions protocolaras a lasqualas sèm convidats (ceremonias de vòts).
Un rescontre dels CREOs, del Congrès e de la FELCO amb Carole Delga al mes de març foguèt l’escasença de sensibilizar la presidenta de la region Occitanie sus aquesta question que s’engatjèt de portar al dintre de l’Assemblada de las Regions de França e davant lo President de la Republica.
La jornada d’estudis organizada a l’iniciativa del Congrès lo 8 d’abrial al Senat, ont participèron Nicolau Rei-Bethveder per la FELCO, Patrici Ròcas per lo CREO Talvèra e Felip Martèl, foguèt una autra escasença de sensibilizar de parlamentaris e de crear de ligams amb las autras lengas.
E la FELCO foguèt saludada coma un dels artesans màgers, sul plan intellectual coma sul plan practic de la manif de Paris lo 30 de novembre, que ne vau puèi parlar.
E ara, que faire ?
La question que se pausa uèi es la de la volontat de l’Estat de respectar los tèxtes internacionals e nacionals sus las lengas regionalas e quitament sos pròpres engatjaments : podèm pas que constatar que las declinasons academicas de la convencion entre l’Estat e l’OPLO son pas signadas mentre que la convencion quadre signada en genièr de 2017 s’acabarà l’an que ven e que, malgrat los engatjaments de M. Lahaye, al Ministèri, los Conselhs Academics de las Lengas Regionalas son pas totjorn meses en plaça regularament.
Es aquel constat partatjat per totas las lengas de França coma o mostrèron los debats e discutidas menats al collòqui de la FLAREP, que menèt a la mesa en plaça de la coordinacion « Pour que vivent nos langues », jos l’impulsion del deputat europenc François Alfonsi que la FELCO s’i associèt e que menèt a una mobilizacion inedita lo 30 de novembre a Paris. Se tracha ara de la seguida de balhar a aquesta coordinacion. Avèm d’i portar nòstra reflexion e d’i faire valer nòstras posicions tre lo 20 de genièr ont la coordinacion se recamparà a Paris.
E los autres nivèls d’ensenhament ?
Se la refòrma catastrofica del licèu nos mobiliza fòrça, devèm pas doblidar los autres nivèls : primari, collègi, universitat e formacion dels ensenhaires ont nòstre ensenhament patís tanben. Devèm pas oblidar que lo desvolopament del bilinguisme se fai pas a l’auçada dels besonhs, e qu’es inegal segon los territòris. E, sus aquò devèm a l’encòp saludar lo trabalh de formiga que fan nòstres partenaris d’OCBI (que saludam lor preséncia a nòstra AG) e regretar que d’OCBI, coma d’OPLO, n’i aja pas pertot sus l’espaci occitan.
Devèm regretar la marrida volontat de l’administracion per assegurar lo seguit e la coëréncia dels ensenhaments de la mairala a l’Universitat.
Devèm regretar l’insufiséncia de formacion en ESPE/INSPE : solament 3 sitis (Tarbas, Carcassona, Montauban) identificats per preparar lo concors especific.
La refòrma dels ESPEs, devenguts INSPEs serà per exemple un enjòc màger.
Vida intèrna de la FELCO
Del punt de vista de la vida intèrna de la FELCO, podèm pas que nos regaudir encara de la reactivitat dels collègas del CA quand foguèron consultats sus tala o tala question o son ajuda preciosa per participar a la redaccion de dorsièrs, al seguit del trabalh parlamentari (Mercé, Bruno Duranton). Subretot, podèm saludar la mobilizacion dins las diferentas accions sul terren amb l’impulsion de las seccions localas, per exemple, en Provença, los contactes professionals amistoses que i aguèt entre collègas « mistralencs » e collègas « occitanistas » : mercé per aquò a Matieu Poitavin.
Constatam pasmens que lo foncionament de la FELCO es pas perfèit, que son accion o sa linha pòdon èsser remesas en causa. Lo fait que i aguèsse uèi doas candidaturas a la presidéncia de l’associacion o mòstra. Devèm pas crentar lo debat e cadun a de faire valer sas idèias. Aquesta Amassada generala ne serà l’escasença. Aurem tanben de començar de pensar a melhorar los estatuts per tal de los rendre mai clars e de dubrir mai l’associacion a los que s’i vòlon investir.
Puèi lo debat daissarà plaça a l’unitat, al recampament positiu per festejar los 50 ans del CREO Tolosa que nos acuèlha uèi e que mercejam per l’organizacion d’aquesta jornada.
La FELCO, ela, joventa, a pas que 33 ans e espèra plan arribar tanben a 50 e contunhar.
