- Presents : B. Bolano, R. Chouleur, D. Colras, C. Gallizia, D. Galvier, J. Rossignol, C. Serva, J. Soliva, MJ Verny
- Desencusats : F. Albert, B. Bringué, D. Dauriac, J. Martin, I. Nuel.
I- Las questions professionalas
Una remarca : un acamp concentrat sus la situacion del 1er gra
La crida de MJ Verny perque los collègas del segond gra vengan a l’acamp portaires de demandas coordonadas d’exprimir per lo CREO es pas estada ausida. Mercé a Catarina Gallizia d’èsser estada presenta e a Beatritz Bringué d’aver, coma o fai totjorn quand es absenta, mandat un messatge. Mas amb aquò es impossible de saber de qué son los besonhs partajats e los problèmas dels collègas del segond gra que semblan pas de se sentir representats per lo CREO.
Qualques elements de situacion evocats
Lo pb recurrent de las ressorsas umanas
Al moment que, per una volontat conjunta de la Region e del Rectorat, los sitis bilingues se desvolopan, la question de las ressorsas umanas se pausa crudèlament a mantun nivèl
- Los remplaçaments que son pas assegurats en bilingue alara qu’avèm de collègas joves qu’an de constrenchas de familha
- La reticéncia de l’administracion a acordar de temps parcials als collègas que n’aurián de besonh per de rasons familhalas e que riscan de quitar d’ensenhar en bilingue per obténer mai aisidament un temps parcial
La situacion a Florac
La dubertura del cursus bilingue sembla encara de pausar problèma a la còla dels ensenhaires ja presents sus l’escòla. An demandat als sindicats d’intervenir al grop de trabalh per dire lors crentas. Lo DASEN los tornarà rescontrar amb la CPD per los rassegurar tornamai sus pòstes e estatuts.
Una sollicitacion del CREO de la part de l’escòla mairala Anatole France a Montpelhièr
L’escòla es presentada dins la plaqueta elaborada en collaboracion entre la vila e lo rectorat (http://www.felco-creo.org/22-06-02-une-plaquette-sur-loccitan-a-lecole-publique-dans-la-metropole-de-montpellier/), mas i a pas de professors qualificats en lenga presents sus plaça. La directritz a escrich al CREO per mercejar Benaset Bolano, de l’escòla bilingua Sévigné, qu’interven un còp per setmana e tanben per demandar una melhora normalizacion de la situacion : semblariá que vòlga d’autras intervencions en mai de çò que se fa. M.J. Verny demanda als collègas del CREO de l’escòla Sévigné (qu’intègra puèi los enfants d’Anatole France en bilingue) de soscar entre eles, amb las direccions de las 2 escòlas concernidas al melhor biais d’optimizar las competéncias dels collègas formats en occitan, dins lo respiech dels servicis e dels estatuts.
Material pedagogic
Una longa discussion es estada menada sus los besonhs en tèrmes de manuals pedagogics per lo bilingue, mai que mai de matematicas (mas tanben d’autras DNL). Lo CAPOC que, fins ara estampava los manuals de matematicas (Cap a las mats) dirián que i a pas pus lo budgècte per completar / tornar estampar los fichièrs.
MJ s’encarga de contactar lo CAPOC, a condicion d’aver, per escrich, las causas precisas de demandar.
II- Las adesions al CREO
Avián plan progressat al primièr trimèstre e se son arrestadas dempuèi. Probable que s’agís per granda part d’oblits de monde que de costuma pagan, e qu’an pas pagat ongan. MJ Verny demanda a cadun e caduna de faire lo torn dels collègas per recampar las adesions oblidadas e explicar a totes l’importança de renfortir lo CREO (que d’unes o d’unas ne sabon pasmens trobar l’adreiça quand i a quicèom que truca…). Los membres del burèu e del CA ensajaràn de s’adreiçar individualament als collègas oblidoses.
III- Relacions amb los elegits
Rescontre amb la comuna de Montpelhièr lo 12 d’abrial (Fanny Dombre-Coste, 1èra adjunta, en carga de las escòlas e Boris Bellanger, adjunt en carga del patrimòni e de l’occitan). MJ demanda a Celina de li faire passar per lo 11 de matin una tièra de questions precisas de pausar que figuraràn dins un document escrich laissat als elegits
IV- Relacions amb l’administracion – grops de trabalh (GT)
Pas de data es encara oficialament arrestada pels GT Gard.
MJ Verny vai escriure als DASEN.
Lo primièr GT se tenguèt en Losera
Se’n tirèt de conclusions puslèu positivas sus la dinamica departamentala. Pausèt un cèop de mai lo problèma de l’estatut d’una collèga contractuala que risca de perdre sas oras s’un collègas titulari del CAPES èra nomenat. Lo CREO, coma los sindicats, demandan la creaction d’una session de CAPES intèrne que permetriá a la collèga de securizar son estatut. L’adminstracion cèrca tanben de solucions.
L’enquista difusida per l’OPLO amb lo DASEN de Losera
per faire l’estat de las ressorsas umantas « dormentas » (= de collègas competents qu’ensenhan pas l’occitan o de collègas que se voldriá formar) mòstra una volontat dels collègas ja en pòste monolingues de passar en occ amb de formacions.
MJ Verny pausa la question de l’equivalent dins los autre departaments e la pausarà a cada DASEN concernit.
Lo GT d’Aude es convidat per lo 13 d’abrial
Situacion dins Gard
Jaumelina Martin partís a la retirada. Una remplaçanta es estada trobada e la còla de las CPD serà aquí per l’ajudar dins un departament ont lo CREO es un pauc flac.
V- Total Festum Langonha lo 3 de junh sul tèma « Contes e legendas ».
MJ Verny merceja calorosament Joëla del trabalh menimós d’organizacion que faguèt e que permetèt l’alestir una bèla programacion : http://www.felco-creo.org/03-06-23-projet-de-programme-de-total-festum-creo-langogne-48/. Merceja tanben Joseta Soliva, clavaira, per lo montatge dels dorsièrs de subvencion e mai Lucie Tressoldi que faguèt una bèla aficha en concertacion amb Benaset. Lo CREO mandarà la convidacion a las personalitats : administracion, elegits, sindicats.
Serà possible de dormir al collègi de Langonha per los collègas venguts de luenh (fraisses preses en carga per lo CREO). MJ Verny prepausa a los que voldràn de faire l’endeman dimenge una escorreguda a pè per melhor conéisser aqueste canton de Losera
La dubertura se farà a la comuna. Los talhièrs pedagogics (lo tantòst) se passaràn a l’escòla mairala e l’espectacle del ser a la sala de fèsta municipala. Lo punt de rescontre de la visita a 10 oras serà dabans l’ofici de torisme. Lucie s’entreva d’apondre los luòcs sus l’aficha abans estampatge.
L’estand per las vendas de libres se pòt metre a la sala de las fèstas per tocar lo mai de mond possible.
La demanda serà facha tanben d’installar un estand sul mercat lo dissabte de matin (tengut per Benaset : mercé a el).
VI- Vendas de libres – ressorsas del CREO
MJ VERNY rampèla qu’es una ressorsa màger per lo CREO, mas que demanda fòrça trabalh de gestion e de manutencion. Merceja Robin Chouleur de se cargar dempuèi la debuta de 2023 del trabalh de gestion. Merceja tanben los autors (notadament Michel Lafon) qu’an vendut de pertot de quantitats de libres crompats per lo CREO amb la reduccion « librari » de 33 %. Lor devèm bèla part de nòstra santat financièra !
Lo CREO vai recebre un don de milhierats de libres editats per l’ex-CRDP (ara CANOPE) e qu’an riscat d’èsser pilonats. Sauvats per una intervencion regda al CALR qu’abrivèt una enquista del rectorat. L’estòc (7 o 8 paletas !!!) serà partatjat entre Rectorat, CIRDOC e CREO. Los tres beneficiaris participèron a una reunion e se metèron d’acòrdi per que los collègas, amb l’acompanhament pedagogic indispensable (mas de fichas d’utilizacion pedagogicas existisson per cada document), pòscan beneficiar dins lor classa d’aqueles documents.
De segur los beneficiaris del don pòdon pas vendre las causas qu’an recebudas, mas ne poiràn faire present per tota crompa d’autres documents.
Compte-rendut fargat per MJ Verny amb l’ajuda preciosa de las nòtas de Delfina Colràs e la relectura de totes.
