Lo Burèu del CREO – Talvera vos anóncia ambe dòl grand la despartida de Claudi Bernard Assémat, ancian president de nòstre CREO.
Sortit de la Montanha Negra, onte nasquèt en 1936 a Labrespin (Labrespy) pròche Masamet, foguèt regent, puèi ensenhaire d’informatica, enfin IA-IPR d’aquesta matèria fins a la retirada.
Afogat per la pedagogia Freinet, sòci del SGEN – CFDT tre la debuta de son ensenhament, venguèt Secretari Nacional encargat de l’Ensenhament Tecnic.
En 1976 establiguèt dins lo sindicat la Comission Nacionala Lengas e Culturas Oprimidas (LCO) onte trabalhèron, fins a 1983, fòrça militant.a.s occitanistas plan conegudas / -guts.
Mantun.a.e.s se remembran los « estagis nacionals » que montèt (a Saint-Pourçain-sur-Sioule, Narbona…) e que se debanèron ambe l’estrambòrd d’una epòca portaira…
En seguida, fondèt ambe d’autr.a.e.s occitanistas parisenc.a.s lo CREO-Talvera que se federèt a la FELCO. Ne demorèt president, fins a 2010.
Gràcias a sa coneissença prigonda de l’administracion de l’Educacion Nacionala,e a son vam personal, lo CREO – Talvera luchèt pel manten de l’ensenhament de l’occitan dins la Talvera parisenca, mantenguèt un contacte eficaç ambe los tres Rectorats d’Iscla-de-França e lo SIEC (Servici Interacademic dels Examens e Concorses d’Arcueil).
En parallèl Claudi foguèt lo mèstre d’òbra de las recèrcas del CREO – Talvera, ambe la parucion d’obratges remarcats : Sus las pesadas de Rainal (2014) Molière l’occitan (2016)…
Doblidem pas una produccion literària importanta, ambe libres sus l’enfància (L’Aucelon de las triplas alas, 2000), racontes / romans autobiografics
(La Pèira desclavada 1976, La Mòrt causida, 1980, Dins aquel temps, 2000) etc…
Caldriá citar tanben un fum d’escriches mai confidencials, que publiquèt de còps jol pseudonim Bernat Negre per l’encausa de la discrecion impausada per sas foncions oficialas…
Doblidarem pas tanpauc la bontat d’un òme de fe que demorèt sempre fisèl a son engatjament caput per las causas que pensava justas, en primièr l’aparament e la promocion de nòstras lenga e cultura occitanas.
Aviá demandat la discrecion mai granda sus sa malautiá e sa despartida, a Lormont (Gironda).
Se pòt onorar sa memòria en plantar un arbre (site Simplifia) e/o exprimir condolenças a sa familha (site Libra memoria).
Patrici Roques, president del CREO – Talvera.
