Ongan, Montpelhièr celèbra Max Roqueta a l’escasença dels 20 ans de sa mòrt. Un molon d’eveniments son prepausats tota l’annada dins la vila e mai al delai coma se vei sul site consacrat a l’escriveire http://www.max-rouquette.org/actualites.
Dins aqueste encastre, los escolans de l’escòla Marie de Sévigné menèron un projècte poetic e artistic en occitan, que mescla lectura, escritura e creacion plastica e que partiguèt de suggestions en linha sus aqueste site .
Amb l’ajuda de lor regent Benoit Bolano, e l’intervencion de 
l’artista plastician Joan Carles Coderc, mercé una ajuda financièra del CREO Lengadòc, los enfants descubriguèron l’univèrs de Max Roqueta, en se focalizant sus los animals del « Bestiari » de l’autor.
Joan-Carles Couderc, demandèt als enfants de realizar de croquís d’aqueles animals. Aital, los escolans exprimiguèron lor creativitat e lor vision dels personatges. Aquestas creacions, un còp agrandidas per l’artista, foguèron incorporadas dins d’òbras muralas, que i foguèron apondudas de citacions de Max Roqueta.
Los escolans participèron a la decoracion de l’òbra amb 
la pintura. Aital, la lenga sortiguèt de l’escòla per s’exprimir dins l’espaci public e los enfants se poguèron connectar amb lor patrimòni cultural e partejar la cultura occitana amb la vila tota.
Per finançar aqueste projècte pedagogic, una subvencion es estada demandada a la vila per lo CREO.
